Science leh maths-a zirlai titha zual 59 an chawimawi
State Council of Educational Research and Training (SCERT) Science Promotion Wing buatsaihin Mizoram Board of School Education hnuaia HSLC leh HSSLC examination-a science leh mathematics subject-a zirlai titha lawmman chu Ningani khan sem a ni.
48th Incentive Cash Award for Proficiency in Science & Mathematics 2024- 2025 hmanna hi thawhhniha then a ni a, a thawhkhatnaah zirlaiten hlawk zawka mathematics & science an hriatthiam theihnan hun hman a ni. Pachhunga University College Department of Mathematics Prof J Lalvohbika’n “Driving Passion for Mathematics” tih thupui hmangin a sawizau a. Department of Science & Technology MISTIC-a senior scientific officer Lalngilneia’n “Artificial Intelligence and Data Science” tih hmangin tunlai thiamna tangkaina leh fimkhurna tur a sawizau thung.
Hmanpuitu School Education minister Dr Vanlalthlana chuan Mizoramah science leh mathematics subject-a tuimi leh taima taka zir thin an awm chu lawmawm a tih thu a sawi a. Zirlai tam zawkin an tui thar zel a beisei tih sawiin, zirna tha zawk kalpui a nih theihnan sawrkar chuan zirchianna leh ruahmanna tha a neih tur thu a sawi bawk.
Tun tuma lawmman dawng chin hi HSSLC leh HSLC MBSE-in a buatsaih examination result top 3 an ni a. HSLC-ah science subject-ah zirlai 25 leh mathematics-ah zirlai 15-in an dawng. HSSLC-ah mathematics subject-ah zirlai 3, physics-ah zirlai 7, chemistry zirlai 4 leh biology-ah zirlai 5-in lawmman la in, an vaiin zirlai 59 an ni.
Science leh maths-a zirlai titha zual 59 an chawimawi
