Sub Divisional Office (Civil) thuthmun zawng zawngah Revenue thuneihna pek vek a, Revenue office changtlung taka siam vek an tum tih Land Revenue & Settlement minister B Lalchhanzova chuan a sawi.
LR&S minister hian Nilaini khan Kolasib-ah assistant commissioner (Revenue) quarters thar a hawn bakah Vairengte SDO (Civil) office-ah Revenue staff-te awmna tur leh Record Room sakna tur hmunhma a en a. Henga a thusawinaah an department-in mipui tana banphak leh awlsam zawk an ngaihtuah tih sawiin, “District headquarters piahlamah SDO (Civil) thuthmunah Revenue thuneihna pek vek a, Revenue office changtlung taka siam vek tum a ni. Khaw tam zawkah village revenue officer (VRO) dah tum a ni a; Election hnuaia BLO-te kalphung ang deuha duan a ni,” a ti.
Heng hmalakna enchhinna atan hian SDO (Civil) thuthmun pahnih – Vairengte leh Thenzawl chu thlan a ni tih a sawi. Revenue leh district administration (DC) kalhrang chu thil fuh lo tak a ni, tiin, minister a nih tirh khan Revenue assistant commissioner (Aizawl North leh South) thendarh a ni a; Champhaiah assistant commissioner office thar hawn thuai a ni dawn a, Thenzawlah pawh sak tura peihfel a ni tawh tih a sawi bawk.
Revenue minister hian Vairengte Bazar hmuna Revenue staff quarters sakna tur ruahmanna a hmunah enin, a sak dan tur drawing leh plan an sawiho a ni.
SDO(C) thuthmunah Revenue office changtlung tak siam tum
