Boxing tuipuitute leh Mizo boxer-te dinhmun thlir chungin a vawi 12 nan LPS Pro Fight buatsaih a ni dawn a, September ni 8, 2026 khian LPS Arena, Falkland-ah tan a ni ang.
Nimina an chairman Lalsawmliana Pachuau hoa LPS Office, Zarkawta Organising Committee thu khawm chuan Boxing Gym intelkhawm hruaitute leh boxer thahnem ngaite ngenna ngaipawimawhin kum 2024 hnua a vawi khatna’n Pro Fight buatsaih an rel tlu.
Nikum khan Pro Fight huaihawt a ni lo a, chuti chungin championship hnuhnung ber chhunzawmin weight hrang panga – fly, bantam, light, welter leh middle-ah boxer-ten champion laite kut atangin title chhuhsak an tum ang.
September ni 8, Thawhlehni zanah LPS Arena, Falkland-ah an inhnek tan dawn a, September ni 4-ah tel turte inbukin, kum 17 atanga 40 inkar, Mizoram chhung leh pawn atangin mahni insensoin a duh apiang an tel thei ang.
Professional boxing chhinchhiahna boxrec-ah ziak lut loin, a tir atanga a tawp thlengin Pro Fight kalphung pangngai anga kalpui a ni dawn a; chutih rualin Pro Fight a zawh hnuah a hranpain zan khat awh professional inhnek, LPS Fight Night buatsaih chhunzawm a ni ang.
Pro Fight hnuhnung ber kum 2024 khan weight hrang pangaah boxer 286 an tel a; a vawi hnihna’n bantamweight-ah Ramthar Lunglei boxer Laldinsanga a champion a, champion lai zinga title humhim awm chhun a ni nghe nghe.
Flyweight-ah Lalrinngheta (Tuipui), lightweight-ah Lalkhawngaiha (Venghlui), welter-weight-ah Lallawmawma (Tuipui) leh middleweight-ah F. Lalthanliana Junior (Electric Veng Lunglei)-te an champion a ni.
September-ah Pro Fight
