Serchhip khawpui cheimawi dawn

Serchhip khawpui cheimawi dawn
Serchhip khawpui cheimawi dan ruahmanna leh hmalak mek dan thlirhoin bawrhsap Paul L Khuma kaihhruaiin a kaihhnawih mi sawmte an thukhawm.
Serchhip chhung pengthuam pawimawh hmun sarihah signage lian tak tak phun a ni tawh a, hei aia te hret hi pengthuam dang pangaah phun belh leh tum a ni. Zebra crossing hmun 45-ah siam tawh a ni a, kawngpui dungah leh hmun pawimawhah Serchhip cheimawina tur palm thing 300 dawn phun a ni tawh. Kea kalna foothpath hungnaah pangpar pot engemawzat tar a ni a, Serchhip Indoor Stadium bul kawngsirah Mizo culture pholang thei tur tarmawi (mural) lian tak dah a ni a, helipad bulah park siam mek a ni. Street lamp post pawh phun ni tawhin, kawtthler cheimawina atan lamp khai a ni dawn a ni.
Bialtu MLA, chief minister Lalduhoma fund atangin water vending machine dahna tur cheng nuai 5 hmuh a ni a, he khawl hian Serchhip a thleng tawh a ni. Serchhip khawpui hulum laia dah tur Pastor Chhawna lim (bust) siam zawh a ni tawh a. New Serchhipah leh bazarah fountain dah tum a ni. Chhiahtlang leh Serchhip inkarah ‘I Love Serchhip’ tih inziak dah tum a ni a, Chhiahtlang laili lai taka high mast-ah thutna hmun siam tum a ni a. Heng bakah hian hmalakna leh ruahmanna kal mek engemawzat ala awm bawk.
Bawrhsap chuan Serchhip town area-a village council, Florists Association, NHIDCL contractors, sawrkar department hrang hrangin khawpui cheimawina atana an sum leh pai, tha leh zung nasa taka an seng chu lawmawm a tih thu a sawi a. District Level Beautification Competition lawmman cheng nuai 50 chauhin a daih seng loa, ruahmanna kal mek hi cheng nuai 80 dawn a tling tawh tih sawiin, mihring tha nena chhut phei chuan senso a sang tawh a, a la san belh zel dawn a, Serchhip Beautification Project hlawhtlinna chu mipui leh sawrkar thawhhona vang a ni tih a sawi. Serchhip khawpui cheimawi hna thawh mek chu a puitlin hunah a enkawltu tur mipui an pawimawh tih sawiin, “Kan enkawl that loh chuan kum reilote ah hnawk leh tawpah a chang thei a ni tih hria a, uluk taka enkawl zui turin mipui ka ngen a ni,” a ti.