Sex video vanga thupha chawi Korean striker
A hmeichhe mutpui thenkhatte hriatpui loh leh an phalna tel loa an chesual lai video a lo lakruk a tlangthan hnuah South Korean football player Hwang Ui-jo chuan a hmeichhe kawpte lakah thupha a chawi.
Amah hlin tumtu ukil-te sawi danin kum 31 mi hian kum 2022 June leh September thla inkar chhung khan a hmeichhe kawp thin zinga pahnihte nena vawili lai mipat hmeichhiatna an hmang lai chu a kawppuite phalna tel loin video-in a lo la ru tih an sawi a; tunhnaia Seoul khaw court hmaa a inlan vawikhatnaah Korean striker hian a chetsualpuite a tihlungnihloh avangin thinlung takin ngaihdam a dil tih a sawichhuak.
He striker hian thla hmasa mai khan English club Nottingham Forest chhuahsanin Turkey club Alanyaspor a zawm a, an ram court lamah a inlan a ngai zui ta a ni.
A video darh chhan hi kumin June thlaa a unau nupuiin social media lama a post vang a ni a; Hwang hian a video thenkhat social media-a tidarhtu lakah hian blackmail thubuai thehlutin, tun September thla khan chu hmeichhia chu kum thum chhung lung ina tang turin thiamloh chantir a ni nghe nghe.
Amah, Hwang-a pawh chuan a kawppuite hriat loha sex video siam ru thubuai a awrh zui ve ta tho a; an puhnaah hian a pha thung a, a hmeichhe mutpuite phalna thlapa video-a la an nih thu court a hrilh.
Sex video vanga thupha chawi Korean striker
