Shanghai-a bul tan fuh Djokovic, Sinner leh Alcaraz

Shanghai-a bul tan fuh Djokovic, Sinner leh Alcaraz
Tennis season kal lai a tawp hnai zel a, season kharna tournament khelh hmaa ATP tournament hnuhnung lam ni tawh Shanghai Masters title inchuhna kal mekah record siama vawili champion tei awmchhun Novak Djokovic chuan a title pangana tur a beisei leh mekna kawngah Inrinni khan harsa zetin Alex Michelsen lakah 7-6 (7-3) 7-6 (11-9) hnehna a chang hram!
Tun kha August thla US Open third round a paltlang zawh loh ringawt hnua Djokovic-a’n ATP Tour match a khelh leh vawikhatna chiah niin, American world number 43 lakah a la khawr deuh tut niin a lang a, a tir game hmasa pathum hloh vekin, set khatna hi tie-break kaltlangin a la thei hram a; set hnihnaah pawh tie-break nen a tlang chho leh hram hram a ni!
Kum 37-a upa ni ve tawh Serb chhaihbuai hreptu Michelsen kha kum 20 mi lek a la ni!
|um 24 zet Grand Slam champion ni tawh Djokovic chuan, “Alex kha tun tournament-a ka tum hmabak ber a nih bakah ka inkhel lo rei leh tawh a,” tiin tum anga a khelh that tawk loh chhan a sawifiah.
Tarlan tak angin, Flushing Meadows-a Australia player Alexei Popyrin a hneh loh hnu khan Davis Cup qualifier match khat chiah khelin, Shanghai hi khelmual a luh leh vawikhatna a ni a, a khup dinglam a tuam bur avangin fit ziktluak lo Djokovic meuh pawh a khawr ve deuh niin a lang a, tour-level title vawi 100 lak tlin a tumna kawngah beisei a sang vak lo!
Kum 2019 hnu lama China rama a inkhel leh vawikhatnaah hnehna chang hram mah se player naupang zawkte’n an rawn tum tawk chho ta zel kha a lawmawm lama a ngaih thu a sawi.
World number four Djokovic-a tum leh tur hi he thu buatsaih lai hian a la chiang lo a, kum 22-a upa Italian Flavio Cobolli leh Swiss veteran Stan Wawrinka inkhela chak zawk zawk an ni ang.
Fourth-seed Djokovic hma hian a vawikhatna’na Shanghai Masters title beisei ve ve leh ATP Tour-a top two player ni bawk Jannik Sinner leh Carlos Alcaraz-te pawhin an bultanna inkhelah hnehna an lo chang ve ve tawh bawk.
Nithum kalta mai khan Italian world number one Sinner leh Spaniard world number two Alcaraz-te hi Beijing khawpuia China Open final-ah hah hnemin an intum a, a tawpah Alcaraz hian 6-7(6), 6-4, 7-6(3)-a defending champion hnehin season kal laia a title palina a sualchhuak thei hram a nih kha.
Inrinni ATP 1,000 event-a bul a tanna inkhelah erawh kum 23 mi Sinner hian 6-1 6-4-a Japanese Taro Daniel sawp chungin khelmualah harsatna a tawk zui ta lo.
Top seed hian a bultanna inkhela hnehna chang turin darkar khat leh minute 17 chiah a mamawh a; third round a luhna kawngah third seed Alcaraz pawhin 6-2 6-2-in tualchhung tlangval Shang Juncheng a sawp a, hnehna chang tura a hun hman hi Sinner aiin minute khatin a tlem zawk.
Tun kha a zawna kum 21 mi Alcaraz-a vawi 10 chak tlinna chiah niin, China Open title a lak hma khan September thla Laver Cup-ah Team Europe tan a lo chak nual tawh bawk a ni.
Kum naupang te ni chunga Grand Slam-a vawili ngawt champion tling der tawh Alcaraz hian Chinese world number 560 Yibing Wu a tum leh dawn a; Sinner hian third round match dangah 37th-ranked Tomas Martin Etcheverry a su thung ang.
Argentine Etcheverry hian inkhel dangah 7-6 (7-5) 3-6 7-5-in Netherlands player Botic van de Zandschulp a hneh a, an hun hman zat darkar thum leh minute 43 kha he tournament’s history-a match khat khelh chhung rei ber hun a ni.
Russian sixth seed Andrey Rublev erawh 6-7 (7-9) 6-4 6-3-in Czech Republic player Jakub Mensik chuan tournament kal lai atangin a vawtla thung.
Tualchar court lama inkhelte chu ruahin a tibuai a, anmatch khelh tur thulh a awm nual a, Alexander Zverev leh Italian qualifier Mattia Bellucci-te erawh outside court atangin chungkhuh nei main stadium court lamah an insuanlut a, kum 27-a upa German second seed Zverev chuan 6-4 6-2 hnehna changin, third-round match pakhatah Australian world number 28 Jordan Thompson leh Dutchman Tallon Griekspoor inkhela chak zawk zawk a tum leh ang.