SHC-a tlingte lalut dawn

Sinlung Hills Council inthlanpuia thlan tlin thar mi 12 chu vawiin – November 18 hian rinawmna thu tiamtira lakluh an ni dawn.
Bial 12 awmna SHC inthlana tlingte hi Aizawl district election officer office-ah vawiin chawhma dar 11.00 hian rinawmna thu tiamtira lakluh an ni dawn a. Protem chairman thlan tur niin, a ni hian thu a tiamtir ang. Sinlung Hills Council chairman tur thlan a ni dawn a, hemi zawh hian member 7 nei MNF leh a thawhpui HPC-R chuan sawrkarna an siam theih thu chairman hnenah an hriattir dawn nia thu dawn a ni.
Vanbawng bial atanga MNF ticket-a thlan tlin Ricky Lalremsanga chu SHC chief executive member tura rawt a ni dawn a, a ni hian executive member tur a ruat dawn a ni. Vawiin vek hian thu tiamtira lakluh turin an inruahman tih thu dawn a ni bawk.
Kumin November 5 khan Sinlung Hills Council inthlanpui vawi 2-na neih a ni a. Bial 12 awmah MNF-in bial 5 la in, an thawhpui HPC (Reformed) in bial 2 la in sawrkarna an siam a. ZPM-in bial 4 la in, an thawhpui HPC-in bial lak an nei loa, Congress-in bial 1 an la thung.
ZPM kaihhruai sawrkar siam tumin hma la an awm nia sawi a ni a, hetah hian ZPM bakah HPC-R leh Congress member tel tura sawi rik a ni a; a hlawhtling zo ta chiah lo nia hriat a ni.