SHG ho hman tur lirthei hlan
Mizoram State Rural Livelihoods Mission (MzSRLM) scheme enkawl pakhat, Aajeevika Grameen Yojana Express hnuaiah RD Block 12 (Lungsen, Aibawk, Khawbung, Tlangnuam, Lunglei, Kawrtethawveng, Zawlnuam, East Lungdar, Sangau, Thingsulthliah, Reiek leh West Phaileng)-a self help group (SHG) member-te hman tur lirthei 19 chu Thawhlehni khan Rural Development & Administration minister Prof. Lalnilawma’n a vailiam.
Aajeevika Grameen Express Yojana (AGEY) hi August 2017 atanga hman tan a ni a. DAY-NRLM hnuaia sub-scheme a ni. AGEY tum ber chu, thingtlanga awm SHG member-te sum lakluhna hmanrua tur, khaw mipuiin tangkai taka bazar, zirna in, leh damdawi in kalna atana hman tur leh khaw chhehvel ei leh bar hmasawnna thlen thei lirthei ruahman sak a ni a. He programme-ah hian MzSRLM atangin cluster level federation-te hnenah AGEY atana hman tur sum pek niin, pung awm loin SHG member-te hian lirthei leina atan an puk a, kum 6 chhungin an rul zo leh tur a ni.
Tun tuma lirthei hlan hi Mahindra Pik Up 17 leh Maruti Super Carry 2 a ni.
Kum 2017- 2018 khan MzSRLM hian AGEY hnuaiah block 12 hnenah lirthei 48 a lo pe tawh a. State Institute of Rural Development & Panchayati Raj Mizoram chuan AGEY hnuaia Mizoram hnathawh that dan an zirchianna report an thehlut a, AGEY enkawlna lama hmasawn zelnan MzSRLM-in a bawhzui dawn a ni.
SHG ho hman tur lirthei hlan
