SHG-te tan Credit Camp nei
Thingsulthliaha Block Level Credit Camp hmasa ber chu Zirtawpni khan neih a ni.
He hun hmanpuitu Rural Development minister Lalruatkima chuan chhungkaw inrelbawlna leh eizawnna kawnga nu pawimawhna a hria a, nuho tana siam scheme tha tak – National Rural Livelihood Mission, self help group (SHG) kaltlanga miretheite chawikanna tur programme chu MzSRLM kaltlangin chak taka hma lak mek a ni tih a sawi.
Mizoram sawrkarin SHG-te a ngaipawimawh a, hamthatna awm thei hrang hrangah SHG member-te leh an chhungte duhsak thin an ni, tia sawiin, SHG hmasawnna chu chhungkua, khua leh ram pum hmasawnna a ni tih hre thar a, mahni hmazawn theuha theihtawp chhuah turin SHG member leh village organisation hruaitute a chah.
SHG zinga loan la mek leh la tharte pawhin theihtawp chhuah a, tha taka loan rul turin RD minister hian a chah a. Tuna an loan lak an rulh that phawt chuan bank hotuten loan pek leh an inhuam reng nia sawiin, tuna an sum puk hmanga hna an thawhna turah training an mamawh phawt chuan a thlawnin MzSRLM kaltlangin training pek an ni zel dawn tih a sawi a ni.
MzSRLM chief executive officer H. Lalchhandami sawi danin, India rama SHG zingah Mizorama SHG-te chu loan chhia (non- performing asset) nei tlem ber an ni. Tan an lakna leh an thahnemngaihna avanga hmingtha an nihna chu thai chhe lo tura theihtawp chhuah zel tura chahin, insurance lak ngai pawimawh turin a chah.
Thingsulthliah RD Block hnuaia SHG 21 hnenah cheng nuai 46,50,000 hu loan sanction letter semchhuah nghal a ni.
Thingsulthliah RD Block hi kum 1974-a din a ni a. MzSRLM hnuaiah hian khua 7 awmin SHG 267-ah member 1777 an awm a, Village Organization 11 an awm bawk. Revolving fund hi SHG 205 in an dawng tawh a, VO 9-in VRF an dawng tawh a. Community Investment Fund Rs. 31,350,000 an hmu tawh a ni.
SHG-te tan Credit Camp nei
