Mizoram Science, Technology & Innovation Council (MISTIC) buatsaihin Japanese pa (mushroom) ‘Shiitake’ leh Oyster pa khawi dan leh UV hmanga heng paa Vitamin D tihpun dan chu Thawhtanni khan zir a ni.
Shiitake leh oyster pa ten an mamawh ang lumna leh vawhna, hnawng mamawh tawk pea khawi dan, Council of Scientific and Industrial Research peng pakhat – Indian Himalayan Bioresource Technology (CSIR-IHBT) in thiamna an hmuhchhuah hmangin inzirtir a ni a. MISTIC-in kum 2021 atanga a lo thawhpui tawh CSIR-IHBT senior scientist Dr Rakshak Kumar chu resource person a ni.
He project hi sawrkar laipuia Department of Biotechnology bultum niin, CSIR-IHBT nen tangdunin kum 2023 khan MISTIC-ah Mushroom Centre din a ni. CSIR-IHBT hian an technology hi MISTIC pe in, vawi engemawzat training a buatsaihsak tawh a. A bikin phuai dip hmanga shiitake pa khawi dan technology hmang hian nikum April atang khan MISTIC chuan Mushroom Centre-ah shiitake, elm, leh oyster chi hrang hrang an khawi hlawhthling tawh. Mizorama tualto pa pawh zirchian a, khawi ve theih beisei a ni.
Mushroom Centre MINECO-ah pa pawh thar (fresh harvest) chu UV chhuntir an ni a. Hei hian pa-in Vitamin D siamtu ergosterol chu ergocalciferol-ah a chantir a, mihring taksain awlsamtea a lakluh theih tura siam a ni. Tunlaiin Vitamin D tlakchhamna khawvel pum huap leh India ramah pawh a nasat avangin kan ei (diet) ah hetiang hi ei tam theih a that thu te sawi a ni bawk.
Shiitake leh oyster pa khawi leh a thatna tihpun dan inhrilh
