Directorate of Information & Public Relations buatsaih film tawi insiamsiakna Mizoram Short Films Competition 2026 endik hna an tan ta a, Nilaini kha endiktu atana ruat mi pangate’n I&PR Mini Theatre, Lianchhiari Run-ah an tan.
He film insiamsiak-ah hian film 41 a lut a, Mizo film insiamsiak awm tawh zawng zawngah tel an la tam ber tum leh film theh luh zat pawh a la tam ber tum nia hriat a ni tiin sorkar thuchhuahah tarlan a ni.
Ruahman dan chuan February ni 24 hian Mizoram Short Film Competition 2026 lawmman sem a ni ang.
Directorate of Information and Public Relations chuan March ni 12 leh ni 13 hian Chapchar Kut 2026 pualin I&PR Mini Theatre, Lianchhiari Run-ah Mizo Film Show an buatsaih leh dawn a, hetah hian intihsiaknaa tel short film engemaw zat bakah Mizo feature film-te chhuah tum a ni.
Hei bakah hian Mizoramin lemchan lama hma a sawn zel theih nan leh film industry hmasawnna atan Directorate of Information and Public Relations chuan Mizorama a vawi khatna atan March ni 16-18 hian ‘Lemchan-Mizoram Film Festival 2026’ a buatsaih dawn bawk.
Hemi atan hian IPRP&S Secretary kaihhruaina hnuaiah Festival Organizing Committee din a ni a, Thawhlehni khan a vawi khatna atan an thu.
Short Film Competition endik tan
