Si hnih phur chunga erlet PSG
A tir lam minute 18 lek chhunga Folarin Balogun-a goal hnih thun hmangin Thawhlehni zan Uefa Champions League knockout round play-off inkhel pakhatah mualneitu Monaco chuan champion lai Paris St-Germain lakah si hnih faiin hma an hruai zet a, PSG erlet hian goal thum khungin 3-2 hnehna nen first leg hnehna an chang phawt.
Goal hnih an chhuah hnu minute 29-ah PSG lam hian an si phurh pakhat zawk an sut then a, he goal hi khelmual a luh atanga rei vak loa substitute Desire Doue tihluh niin, chawlhlawk dawn minute 41-ah Achraf Hakimi chuan half-volley pui tak hmangin mikhual si phurh a sut zo a; kha goal kha season kal laia a Champions League goal hmasaber niin, half time-ah team pahnih hi 2-2-in an inhnehtawk phawt.
First half chhung hian Vitinha chuan Wout Faes-a penalty chawi chu goal-ah a chantir zo lo.
Second half tan atanga minute thumna lekah Monaco player Aleksandr Golovin hnawhchhuah niin, Vitinha laka a foul avanga red card hmu Russian forward hi a tirah yellow card pek phawt ni mah se referee-in khelmual sira monitor atangin thil thlen dan a ennawn a, red card a phawrh zui ta zawk a ni.
Ti hian, Golovin hian ni li lek chhungin tum hnih ngawt hnawhchhuah a tawk hman ta!
Defending champion PSG lam hian a tam zawk ni mah se goal an thun nghal mai thei bik lo a, minute 67-ah indaihzai zawk an nihna hlawkpuiin Doue chuan Warren Zaire-Emery siamsak atangin a goal hnihna leh mikhual team chakna goal ni zui ta a thawh leh a, October 2019 hnu lamah PSG substitute zinga Champions League match khata goal hnih leh a chung lam chin thun leh thei hmasaber a ni.
He Frenchman Doue hi mipui 10,287 punkhawmna Stade Louis II khelmualah khan manager Luis Enrique chuan bench lamah a thuttir zet a, mahse, si hnih an chhuah hnu first half laihawlah Ballon d’Or winner Ousmane Dembele thlakin bench a thawhsan a, chakna goal pawimawh pahnih thawhtu a ni zui ta a ni.
European match-a French club ve ve intum vawi khatnaah kum 20 mi leka upa French forward Doue hi player langsar ber a ni.
Champions League play-off return leg-ah February ni 25, Nilaini khian Paris St-Germain hian Paris khuaah Monaco hi an mikhual ve thung dawn a ni.
Si hnih phur chunga erlet PSG
