BJP-in MLA a neihna Siaha district tan sawrkar laipui atangin district tih hmasawnna tur cheng vaibelchhe 250 pek a ni dawn niin BJP Mizoram president Vanlalhmuaka chuan a sawi.
AMC Ward-XIX by-election neih turah June 14 tlai khan street campaign khuhhawn a ni a. Heta thu sawitu BJP State president chuan, AMC Ward-19 huamchhungah harsatna nasa tak kan tawk mek a, he harsatnaah hian state sawrkar puihna piahlamah central puihna tha zawk hmuh theihnan BJP candidate a pawimawh hle dawn a, ‘model ward’ ni tura siam tumin hma an la dawn tih a sawi.
“Nakin lawkah Siaha district tan central-in cheng vaibelchhe 250 a rawn pe dawn a, eng vang nge kan tih chuan MADC ah leh MLA inthlanahah BJP hlau lo leh zahpui loa an thlan vang a ni. Ward-XIX ah pawh hian BJP candidate kan thlang tling a nih chuan Union Minister of Housing and Urban Affairs Manohar Lal Khattar chu Ward-19 ah rawn kalin, khawtlang hruaitute leh NGO ten khawtlang harsatna hrang hrang leh kan mamawh a hmun ngeiah kan thlen thei dawn a; party dang candidate chuan chutiang chu an ti thei ve dawn lo,” a ti.
Hei mai niloin, Ward-19 huamchhunga MLA pahnih pawhin BJP candidate a tling a nih chuan an chhawr tel nghal dawn tih Vanlalhmuaka hian sawiin, “He hun tha hi bawhpelh lo turin Ward mipui ka chah duh u a ni,” a ti.
AMC Ward-XIX a an party candidate chu party dang candidate-te nen khaikhin chuan eng kawngah mah a tluk lohte vek ni mag se, Ward-19 tana hmasawnna hna thawh kawngah erawh party dangte aiin a thawh hlawk zawk ngei dawn a, corporator-ten Ward Fund chauh hmanga development work an kalpui thin ang niloin, central-ah Ward hmasawnna piahlamah AMC pum tan pawh hamthatna hai chhuak turin a rintlak dawn tih a sawi a ni.
Siaha district tan central-in cheng vbch. 250 a pe dawn – MBJP president
