Sihphir leh a chhehvela iskut
hmun lei a tha tawk tawh lo
Iskut thar tam thin Sihphir leh a bul vel khuaten an tharchhuak tlem tial tial a, a chhan hi zirchian a ni. Mission Foundation Movement-in a zirchianna report an buatsaih hi Zirtawpni khan Agriculture & Farmers’ Welfare minister PC Vanlalruata’n a tlangzarh.
Project coordinator HL Lalrinawma report danin, Sihphir, Durtlang leh Lungdaiah hian iskut tam tham tak thar a ni thin a, state pawnah pawh thawnchhuakin chhungkaw tam takin eizawnna atan an hmang thin. Kum 10 vel kalta atang khan iskut tharchhuah a tlem tial tial a, tunhnaiah phei chuan a zuih ral ti tih a ni.
Zirbingnaa hmuchhuah tlangpui – ram leilung a thur deuh vek a, al a tam a, leiin tui a pai theihna a tlahniam; SOC (leia thil tawih awm) a tlem tial tial a, thlaiin an mamawh (NPK) duh khawp an pai lo; rannungin a tichhe nasa bawk
Heng hi a chhan langsar zual nia ngaih a ni – sik leh sa inthlakin a nghawng; a chinna hmun a awih vang; chemical fertilizer an hmang nasa tawh a, tihtawp thut a nih vang; technical training mumal an dawng tam tawk lo; hun rei tak a hmun ngaiah chin thin a ni a, soil testing neih loh avangin farmer-ten lei dinhmun an hre chiang lo; tui an tlachham.
Zirbingna hi a bul tanna tur chauh a la ni tih minister hian sawiin, sawrkar chuan iskut chingtute kawmin hma lak zel dan a ruahman dawn tih a sawi a. KVK Selesih chu loneitute tan thil tangkai tak a la ni dawn tih a sawi.
Durtlang, Sihphir leh Lungdaia iskut thar a tlem tial tial chhan zirchianna hi sawrkar laipui Ministry of Tribal Affairs TRI scheme hnuaiah cheng nuai 25 sengin Social Welfare department kaltlanga neih a ni a, kum khat chuang a awh.
Sihphir leh a chhehvela iskut hmun lei a tha tawk tawh lo
