Sikul chungchang khawtlangin buaipui

Sorkara lut tura inngai, lut leh ta lo adhoc-aided high school te an chawl leh ta a, kar hmasa Ningani atang khan sikul 95 an chawl mek. Heng sikulte chungchang hi hmun engemaw zatah chuan khawtlangin an buaipui mek.
Mizoram Govt. Adhoc-Aided High School Teachers Association (MIGAHTA) tia intelkhawm adhoc-aided high school-te hi provincialise an nih hnuah sut leh niin, lump-sum grant-aid dinhmunah dah an ni. A hmaa an dinhmun aia hniamah dah an nih avangin an lungawi lo a ni.
Kawng hrang hranga lungawi lohna an lantir hnuah July ni 30 khan sorkar mite nen an inbia a, MIGAHTA lamin an sawi danin, August ni 12-a ZPM PAC-in an ngaihtuah tur an sawi a, chumi hma chuan dinhmun hniam zawka an awmna tur hi sorkarin notification chhuah lo se an tih laiin August ni 4-ah sorkarin notification hi a chhuah a ni.
MIGAHTA te chuan August ni 6 atang khan mass casual leave an la ta a, chuhtih rual chuan, ‘Casual leave hi la lo mah ila khawtlangin sikul an khar a, kan kal thei dawn chuang lo,’ an ti.
Hmun hrang hrangah he thil hi khawtlang thilah an la a, khawtlang hruaitute’n August ni 4-a sorkar notification pawh an hal sup sup. Sikul pawh an khar a, khawtlangin he harsatna hi a hmachhawn mek niin a lang.
Tlabungah chuan Modern High School chungchangah Tlabunga tlawmngai pawlte leh political party-te an kalkhawm a, “Modern High School, Tlabung hi September 22, 2023-ah Mizoram sorkarin provincialise status-ah a hlangkai a. Nimahsela June 18, 2024-ah min revoke a. August 4, 2026-ah dinhmun hniam lehzual Category S1-ah a dah leh zel hi pawi kan ti a. Kan mamawhna hriain Mizoram sorkar hian an dinhmun ngai provincialise status-ah hlangkai leh rawh se,” tiin resolution an pass. Hmun dangah pawh khawtlanga pawl hrang hrangin he thil hi an buaipui mek.
“Khawtlang thil a ni a, a chhan chu tuna govt adhoc-aided high school-te hi khawtlang ta a ni a, khawtlang din, khawtlang enkawl a ni. Chuvangin, hetia dinhmun hniam zawka min han hian khawtlang an lungawi lo a ni,” MIGAHTA hruaitute chuan an ti.
“Sikul zawng zawnga zinga 70% velah chuan tunah hian khawtlangin lungawi lohna hi an lantir tawh niin kan hria,” an ti a, kawngzawh te pawh an awm thu sawiin, MLA bial ang zawng te, district ang zawngtea inthurualin sikulte hian mahni remchan dan angin ke an pen tih an sawi.
MIGAHTA-ah hian sikul 95 an tel a, thawktu hi 700 tling lo deuh an ni. July ni 21 leh ni 22 khan badge dum an lo bel tawh a, July ni 23 leh ni 24 khan No Teaching Day hmangin lungawi lohna an lantir leh. July ni 27 leh ni 28-ah mass casual leave an la a, July ni 29-ah Vanapa Hall kawtah pungkhawmin lungawi lohna an lantir. July ni 30-ah sorkar lam nen an inbia a, August ni 3-ah sikul an kal leh a ni.