Tun hnaia social media-a video tarlan, Govt Mizo high school compound chhunga drug addict-te inchiu an awm thin thu han hriat hian, ruihhlo do hi thapuia beih a hun tawh takzetzia a rawn pholang chiang leh ta hle niin a lang.
He video lo entu zingah hian he high school headmaster ngei pawh hi telin, ‘harsatna lian tak, kan chinfel zawh theih si loh’ tiin a rawn comment nghe nghe a. Hun rei tak ata an lo buaipui tawh a nih hmel a, tun thlenga harsatna sutkian theih loha a la awm hi a pawi hle. Hei hi thuneitute hian en chiang se, zirna in compound chhung ngeiah hetiang thil a thleng thei a nih chuan, a nghawng tur chu a tha lo hle dawn tih a chiang reng mai.
Aizawl khawpui hmun lun lai, new market leh a chhehvel-ah chhun pachangah pawh khawilai kawmkarah emaw lo inchiu ngawng ngawng hmuh tur an awm zut thin tih hi sawirikna a rei tawh a. Hmun ualau laiah pawh hetiang tih ching hmuh tur an awm reng theih chuan, hmun biru zawkah phei chuan an tam lehzual ngei ang tih a rinawm.
Ruihhlo ngaite hi hetianga ualau taka mi hmuh laia damdawia inchiu ngam an nih tawh chuan, chhia leh tha hriatna an hloh thuk tawhin, pawisak an nei tlem tawh hle tih a hriat reng mai a, hei hi mipui tan pawh a him lo nghal. Khawi lai kawmkar hmun biru deuhah phei chuan inrawkna a thleng lovang tih sawi theih a har ta. Inrawk mai pawh ni lovin, inthahna hial pawh thleng thei a ni awm e. Kawmkara bawlhhlawh chheprelh kan thianfai thin ang hian, khawlaia hnawksak drug addict-te thenfai hnatlang neih te pawh a ngai ta niin a lang. Tunah hian meisi a de ve ve a, ngaihthah avanga kang hluai thei a ni tih kan hriatnawn a pawimawh awm e.
Sikul compound-ah inchiu
