Sinner a champion

Pathianni zan khan Turin khawpuiah ATP Finals khelh zawh a ni a, Jannik Sinners chuan set hloh lova Taylor Fritz hnehin a vawi khat nan a champion.
Final a intum Sinners leh Fritz te hi group match ah an lo intum tawh a, an intum hmasak zawk \um pawhin set hloh lovin Sinner a chak. Ilie Nastase Group a\angin Sinner leh Fritz te hian semi-final an lut. Champion tura rinkai ber Sinner hian semi-final-ah John Newcombe Group-a pahnihna Casper Ruud a hneh a. Taylor Fritz hian John Newcombe Group champion Alenxander Zverev hnehin final a lut ve leh bawk a, Sinner nen final-ah an intum leh a ngai.
Final-ah hian inhnehtawk takin bul an \an a, gam an inlak chhawk zak zak. Set khatna leh set hnihnaah tualchhung tlangval Sinners-a’n break a nei ve ve a, 6-4, 6-4 a hnehna changin a vawi khat nan ATP Finals-ah a champion. Champion thar Jannik Sinner hi Italian zingah ATP Finals-a champion thei hmasa ber a ni a.
Final hmuhnawm takah Taylor Fritz hnehtu Jannik Sinner hian ATP Final 2024 khelh chhungin set a hloh miah lova, kum 1986-ah set hloh lova lo champion tawh Ivan Lendl hnu lamah ATP Finals-ah set hloh lova champion leh thei hmasa ber a ni nghe nghe. Sinner hi kum 2024 chhungin a khel \ha tak zet a, Australian Open leh US Open-ah a champion a, a vawi khat nan World No. 1 ni chungin kum a khar dawn bawk. 2023 final-ah Djokovic hneh lovin lo tlawm tawh mah se, an ramah ngei Sinner hi a champion ta nge nge a ni.