Sipai beihpui thlakna live-a pek chhuah khap
Indian information & broadcasting ministry chuan Inrinni khan kaihhruaina tichhuakin chanchinbu zawng zawngte chu sipaite beihpui thlak leh an chevel chu live coverage tichhuak lo turin a ti.
News agency, digital platform leh social media hmangtute chu ram himna kaihhnawih thei thil a nih avangin fimkhura hetiang ti lo turin a ti.
“Ram himna atan media platform zawng zawng, news agency leh social media hmangtute chu dan leh thupek zawma ram venhimna leh himna thil tilang lo tura tih an ni,” tiin ministry chuan thuchhuaha a tar lang.
Sorkar hian thlalak leh video live-a tichhuah te, hmun khirh bika thil thleng live-a pek chhuah te leh sipai chet mekna tihchhuahte chu a khap a ni.
Beihpui thlakna pawimawh bikte rang taka tihchhuah zung zung chuan hmalak zelna a tibuai theih a, mi thenkhat himna a tiderthawng thei bawk niin an sawi.
Tun hmaa Kargil buaina te, 26/11 Mumbai beihna te leh Kandahar-a thlawhna hruai kawi a nih laia thil thleng, chanchinbumite khuahkhirh loh lutukin thil a tihbuai theih dante pawh thuchhuahah hian tar lan a ni.
Ministry hian chanchinbu, digital platform leh mi tute pawh ram himna atan hian an pawimawh vek tih a sawi bawk.
Ministry chuan thupek zawm lo chu na taka hrem theih an ni tih sawiin, “He khuahkhirhna zawm lova ram himna tiderthawng zawnga live-a firfiakte laka beihpui thlakna leh sipai chevel live-a tichhuak TV channel-te chu na taka hrem an ni ang,” an ti.
Sipai beihpui thlakna live-a pek chhuah khap
