Sir Bobby Charlton a herliam

England leh Manchester United player ropui Sir Bobby Charlton chu Inrinni khan kum 86 mi niin a boral. Inrinni zan khan EPL inkhel hrang hrangah sunna hun neih nghal a ni.
England leh Manchester United player ropui zinga tel reng tawh tur ngland Bobby Charlton hian kum 1953 khan school naupang a nih laiin Manchester United a zawm tan a. Kum 1954 atangin professional player a ni zui nghal. October 1956-ah Charlton Athletic an hmachhawn tumin United first team tan a vawi khat nan a khel. Kum 1958-ah tlawhna chesual vanga United-in chhiatna nasa tak an tawh tum khan a tel ve a. United player pariat tela mi 23 zet an boral tum khan vanneih-thlaktakin dam khawchhuak zingah a tel teh mial.
Charlton hian United tan inelna hrang hrangah vawi 758 khelin, goal 249 a thun a. A hun lai hian United tana khel tam ber leh, United tana goal thun hnem ber record a siam. United tana khel hnem ber record a siam hi hun rei tak hnuah United tana vawi 963 zet khel tling Ryan Giggs-a’n a khum a. United tan goal thun hnem ber record a siam pawh Wayne Rooney-a’n (253) a khum zui ve leh ta bawk. United tan kum 17 zet a khelh chhungin league title pathum a la a, European Cup leh FA Cup ah vawi khat ve ve a champion pui bawk.
Kum 1958 atangin Charlton hian England tan a khel tan a. Ram tan inelna hrang hrangah vawi 106 khelin, goal 49 a thun a, a hun lai hian England tana goal thun hnem ber a ni. Three Lions tana goal thun hnem ber a nihna hi Wayne Rooney leh Harry Kane ten an khum tawh thung. World Cup 1966 ah khan England a champion pui. He world cup ah hian England tan a khel tluanchhuak vek nghe nghe a ni.
World Cup ah England a champion pui kum hian Football a chawimawina ngaihhlut hlawh Ballon d’Or a dawng a. BBC Sports Personality of the Year Award ah kum 1958 leh 1959 ah thlan a nih bakah kum 2008 khan Lifetime Achievement award a dawng bawk. Heng chawimawina ngaihhlut hlawh tak tak bakah hian British khua leh tui chawimawina sang OBE leh CBE hlan a ni bawk.
United chuan an player ropui chawimawi nan an khelmual Old Trafford a South Stand chu kum 2016 atang khan Sir Bobby Charlton Stand tiin hming thar an vuah.
Footballer ropui Sir Bobby Charlton hi kum 2020 atang khan natna khirh tak dementia (rilru kim lohna) a vei tih hmuhchhuah a ni a. Uluk taka enkawl ni bawk mah se a thachhuak zo ta lo a. October 21, karliamta Inrinni khan chatuan ram panin a herliam ta a ni.