Congress President Mallikarjun Kharge-a chuan electoral roll Special Intensive Revision (SIR) kalpui mekna state hrang hranga hna thawh tur an ngah lutuk avanga Booth Level Officer (BLO) tam tak intihlum an awm tawh nia sawi chungchangah BJP chu na takin a sawisel.
Kerala-a Kannur-ah BLO intihhlum avanga titi a awm hnuah West Bengal-ah intihlum an awm leh.
Chanchinbua an chhuahte sawi chhuakin state parukah BLO 16 an thi tawh nia sawiin Kharge-a chuan inthlan tihchingpenna chuan ‘thihna a thlen’ niin a sawi.
X-ah SIR kalpui chu ‘tihluihna’ tia sawiin pawisa tlanglian tihthih leh COVID vanga inkharkhip hun lai nen a khaikhin a. Congress chief hian BLO-te thihnaah hian election commission chu ngawi tlatah a puh bawk.
“BJP-in vote an rukna chu thihnaah a chang ta a. Hna ngah lutuk avangin BLO leh polling officer-te an intihlum a. Hetiang tuarte ka tawrhpui tak zet a. A tak takah phei chuan an sawi aiin hetiang thil thleng hi a tam dawn a, ngaihven a ngai a. Tuin nge heng chhungkuate tan hian pen chhuak ang,” a ti.
“BJP chuan thuneihna chan duhin ruk an ru a, Election Commission of India lah a ngawi tlat bawk si,” a ti.
Intihhlumna thlengte hi BJP-in ‘thuneihna chan an châk vang’ tia sawiin Congress chief chuan nasa taka SIR kalpui mek nasa taka dodal turin a ngen a, tunah hian state leh union territory 12-ah kalpui mek a ni.
Kharge-a’n chanchinbuten an chhuah a tar lan chhawnah state parukah BLO 16 an thi tawh a, Gujarat leh Madhya Pradesh-ah pali ve ve, West Bengal-ah pathum, Rajasthan-ah pahnih leh Tamil Nadu leh Kerala-ah pakhat ve ve a ni.
West Bengal-a BLO a thih khan politic-a inbeihna nasa tak a chhuak a, Governor CV Ananda Bose chuan Pathianni khan Shanti Muni Ekka thihna hi SIR an tiha tih tur a ngah lutuk vang nia sawiin chhui zui a nih tur thu a sawi.
SIR vanga BLO thihnaah Congress chief-in BJP sawisel nasa
