Leia ding nghet cherh chawrh chung pawh rem dik thei lo tur hi mi tam zawk kan nih laiin YouTuber Tom Kopke (Germany) chuan van boruak sang tak atanga chak taka tla vawn vawn chungin second 23.333 chhungin a rem dik thei a, Guinness World Record a siam. He record hi February thla khan Mossel Bay, South Africa-a a siam niin, a hmaa hetiang record chu 2023-a Sam Sieracki (Australia) siam niin, ani hian skydiving chungin second 28.250 chhungin a rem dik ve thung.
Tom, kum 23, hi medical student niin,, Rubik’s cube hi tleirawl kum 18 mi a nih lai atangin a tuipui ve tan a, “Chutihlai hian ka buaipui nasa khawp a, ka practise nasa thin a, Rubik’s cube challenge video te pawh a siam ve nual tawh a, engtikah emaw chuan skydiving chungin ka rem dik khawp ang, tih te ka lo sawi lawk ve tawh a. Mahse, chutih lai chuan skydiving license nei turin sum ka nei lo a, ka tihlawhtling thei lo. Tunah chuan ka tihlawhtling ta a ni,” a ti.
Tom hian tui chhunga Rubik’s Cube rem dik rang record te pawh a lo nihrual ve tawh a, mit tuam chunga cube rem dik te pawh a thiam nal tawh hle a ni.
Tom hian skydiving lova, lei a ding nghet cherh chawrh chung chuan Rubik’s Cube hi second 9 velah a rem dik thei a, chawhrualin cube rem dik nan hian second 15 aia tam a mamawh lo nia a hriat thu a sawi bawk.
Tom chuan, “A tirah chuan skydiving laia bawk zawnga awm chungin record siam theih ka ring a (hetiang hi record hmasa siamtu pawhin a tihdan a ni). Mahse, thli a na lutuk a, ka rem dik tha thei lo tih ka hrechhuak nghal thuai. Chutah ka instructor, Arnold van Dyk chuan zangthal zawnga awm chunga rem dik tum chhin turin min ti a. Mahse, hlauhawm tak a ni, ka hnuailama lei engtia hnai tawh nge tih te a hmuh theih tlat lo. Mahse, thli thaw na avanga rem min tibuaitu chu a ziaawm zawk bawk si. Skydiving ka tihna kar hnih khat chauh a la ni a, chutiang karah a zangthal zawnga awma Rubik’s Cube rem dik tum bawk chu inzir a ngai nasa ngang mai,” a ti.
Skydiving chunga Rubik’s cube rem dik rang record siam
