Skywalk/Ropeway thubuaia puh
tel minister hlui 2 la fihlim thei lo
Tourism minister hlui pahnih John Rotluangliana leh Robert Romawia Royte ten Skywalk leh Ropeway project hnuaia eiruk thubuai kal meka eirua puh an nihna paih an dilna (discharge application) chu Special Court (Prevention of Corruption Act) chuan Nilaini khan a hnawl a; puh an nihna hi court-in a la ngaihtuah chhunzawm dawn.
Prevention of Corruption Act special judge F Rohlupuia hnena an inlannaah, Robert Romawia Royte tana ding ukil chuan he thubuai kalpui zel tura puhna tling leh finfiahna tha a awm lo tih a thlen a. Prosecution lamin court hnena innghahna atana an hman hrang hrang note-sheet leh payment records chu he puhna atana rintlak a nih loh thu a sawi.
John Rotluangliana ukil pawhin, project fund-a sum chu a dawng ngei em, tih leh, a lo hlep ru em, tih finfiahna mumal a awm loh thu a thlen bawk.
Court chuan charge-sheet, court-a document thehluh leh puhte pahnihin court-a an thu thlen a ngaihthlak hnuin, an pahnih lakah hian thubuai kalpui zel turin thu tling a awm niin a hmu a. Dan angin an thubuai hi ngaihtuah chhunzawm a nih tur thu a sawi. Chutihrualin, court chuan tun dinhmuna an thu ngaihtuah chu discharge application chungchang chiah a nih avangin, an puhnaah hian thiamlohna an nei nge nei lo tih chu la ngaihtuah chhunzawm tur a ni tih a sawi a ni.
He case kal meka puh zing ami Robert Romawia Royte chuan, Ropeway leh Skywalk chungchang chhuinaah puh a nihna chu paih mai tura a inrin lai leh dan kalha chetna emaw eirukna thila inhnamhnawihna emaw a neih loh zia a chian vek lain, he thil atanga amah chhuizui loa chhuah zalen a dilna pawm a nih loh avangin High Court-ah a dikna hailan a nihna atan zualko a tum tih a sawi.
Skywalk/Ropeway thubuaia puh tel minister hlui 2 la fihlim thei lo
