Snap CEO Evan Spiegel leh a nupui, supermodel Miranda Kerr te chuan Californians damlo, an inenkawlna senso (bill) ba dollar maktaduai 550 an rulh sak. An nupa hian damlo 2,61,000 chuang bill ba hi an rulh sak a ni.
An nupa hian heng damlo te inenkawlna senso bâ hi tlawmngai pawl pakhat Undue Medical Debt kaltlangin an rulh sak a, he pawl hi damlo harsa zual, an inenkawlna senso tur nei lo te tana sum ngaihtuahsak thintu an ni a, an pawl hian damdawi in hrang hrang a damlo te bill bâ te lakhawmin, Evan leh Miranda te nupa sum thawh hian an rulh sak ta a ni.
Miranda Kerr chuan, “Kan hmangaih te an damloh chuan, an dam leh thuai theih nan an inenkawlna tur te kan ngaihtuah zung zung thin. Chuvangin, damlo inenkawlna senso bâ te hi rulh sak kan ni, an chhungkuain leiba avanga rilru hah lova, an hmangaih te an enkawl chhunzawm zelna tur an ngaihtuah theih nan kan ti a ni,” a ti.
Evan leh Miranda leh Undue Medical Bill te hian Evan te nupa sum thawh zat chiah hi an puangzar lo nain, bill bâ an rulh sak zawng zawng hi mi 2,61,000 chuang an ni a, an ba tlingkhawm hi dollar maktaduai 550 a tling tih an tarlang thung.
America ram, a bik takin California-ah hian khawsak a harsa viau mai a, hei vang hian medical bill bâ pawh a tam hle niin an tarlang.Undue Medical Debt President leh Chief Executive Allison Sesso chuan thuchhuah siamin USA-ah puitling pali zela pakhat chu medical bill bâ an nei niin a tarlang a, hetiang karah Evan Spiegel leh Miranda Kerr te thilpek chu chhungkaw tam tak tan thawk huaina tur a nih thu a sawi.
Evan Spiegel hausakna hi dollar tluklehdingawn 2 vel niin an chhut a, a nupa Miranda Kerr nen hian mi leiba rulhsak kawngah an mikhual tawh lo viau mai a, 2022 pawh khan Otis College of Art and Design a zirlai te loan an lo rulh sak vek tawh bawk a ni.
Snapchat CEO Evan Spiegel leh a nupui Miranda Kerr ten damlo bill bâ $550M rulh sak
