Tunlaia social media hmanga bawngsa hring zawrh chu mihring leh hrileng laka him a nih leh nih loh hriatchian a nih loh avangin endik ni thei se an duh tih Aizawl New Market-a bawngsa zuartute chuan an sawi.
Bawngsa Zuar Multipurpose Cooperative Society Ltd hruaitute sawi danin, tunlai hian Facebook-ah bawngsa, rate tlawm zawka zuar thin an awm a. A sa ei tura bawng lokalna Champhai pa chuan bawngsa rate tlawma a lo thawn thei ang hian, Aizawla bawngsa zuarten rate tlawm zawka bawwngsa an hralh theihna’n tlawm deuh zawkin bawng pum pe ve thei se an duh hle tih an sawi.
Facebook kaltlanga rate tlawm zawka bawngsa zawrh chu a talhna hmun leh a talhtute pawh hriat loh, Vety doctor ten an endik a ni em tih pawh hriat loh a nih avangin mihring tan a thianghlim em tih hriat a ni lo tih sawiin, Aizawla bawngsa zawrhna hmun pangngaia an zawrh chu Vety doctor ten an hriselna an endik hmasak vek bakah sa talhna hmun bik – Slaughter House-ah sa talh tura a bika ruat leh training pek vek ten an talh sak a ni a, bawng dam lo leh talh atana him lote chu Vety doctor-te ruahman sakna hian a hmun bika ruatah enkawl zui phawt an ni thin tihte an sawi a ni.
Fb kaltlanga bawngsa zawrhah hian a thlalakah New Market vela an sa zawrh lai chu hman a ni thin tih an hmanraw hman thlalaka lang tel atangin an hre thei tih an sawi bawk.
Social media hmanga bawngsa zawrhte endik thei se an duh
