ZPM chu social media chakna hmang tangkaia sawrkar an ni tih Congress president Lal Thanzara chuan a sawi a. Social media vang vek hian sawrkar atanga an chhuah leh thuai a ring tih a sawi.
Zirtawpnia Congress Bhavan-a inkhawmah MPCC president hian, Mizoramah Mizo Union leh Congress, PC leh MNF an sawrkar tawh a, tunah ZPM a sawrkar a, hun kalta zawng zawngah khan ramin Pathian hruaina ropui tak a dawng thin tih a sawi.
Mizo Union hnuaiah inrelbawlna kan la neih ngai loh District Council kan nei a; UT leh state kan nei chho a, khang hun kalta zawng zawng thlirlet chuan Congress sawrkar laiin Mizoramin Pathian malsawmna a dawng nasa ber em aw tih tur a ni, tiin a sawi.
“Kan rama hmasawnna tluantling zawng zawng hi Congress sawrkar laia kan neih a ni,” Lal Thanzara hian a ti a. Hydel power, Referral Hospital leh referral hospital mai ni lo medical college, tui supply chungchang, khualzinte damlote tana mamawh airport leh helicopter service, thalai infiammite mamawh infrastructure pawh Congress sawrkar laia Pathian malsawmnaa kan neih niin a sawi.
“Heti chung hian, thangthar, rambuai pawh hre lo, lehkha tak tak chhiara bihchiang peih si lo, social media-a innghatte an thluak an su a, kum 30 chhungin MNF leh Congress in-sawrkar chhawk kha engmah an ti lo, tiin keini min enchhin rawh u, an ti a. Social media avangin ZPM a sawrkar a, social media avang vekin sawrkar atanga an chhuah leh thuai ka ring,” a ti.
Tunah MLA pakhat chauh an nei chungin, mi reng rengin ZPM a sawrkar rei an rin loh thu leh a dawtah chuan Congress an sawrkar an rin thu an sawi thin chu a mak angreng hle tih Congress hruaitu hian a sawi bawk.
Social media vanga sawrkar hi social media vangin an tla ang – Lal Thanzara
