Spanish high court chuan Spanish sorkar hnuaia chhiah khawntu (an taxation department ang a ni mai ang chu) te chu Shakira hnen atanga chhiah euro maktaduai 55 (dollar maktaduai 64) an lak tawh chu, an chhiah chawi tir dan a dik lo tiin pe kir leh turin a hriattir ta rup mai le. Mahse, high court thutlukna hi tax official-te chuan Supreme Court-a khin let an tum thu an sawi ve thung a, Supreme Court thutlukna a awm hma chuan cheng engzat mah pek kir an tum loh thu an sawi bawk.
Spanish tax official-te hian 2021 khan Shakira hian 2011 khan chhiah awl ruk a nei tiin an lo thing lui tawh a, hemi chungchanga thu kal zelah Audiencia Nacional high court thuchhuah chuan Shakira chhiah chawi tir dan hi a dik tawk lo tiin, income tax an lo chawi luih tir tawh te chu pe kir leh vek turin sorkar a hriattir ta a ni.
Spain-ah hian a ram mi an nih kher loh pawhin an ramah kum khatah ni 183 chin an awm tling a nih chuan income tax an pek a ngai tiin dan an nei a, tax official-te chuan Shakira hian Spain-ah kum khata ni 183 awm tling chungin income tax hi a pe lo tiin an thing ta tluk tluk mai a ni.
Shakira chuan he kumah hian kum khatah Spain-ah ni 183 a awm tlin loh avangin income tax hi a pek a ngai lo tiin tan a khawh ve thung a, evidence hrang hrang te endik a nih hnuah Shakira hi ni 163 chauh Spain-ah a awm tih chu thutlukna a ni ta a, chuvangin court chuan a ram mi anga chhiah chawi tir tur a ni lo, a ti ta a ni. 2011-ah hian Sakira hian ram hrang hrang 37-ah concert vawi 120 a nei hman a, chuvangin Spain-ah hian ni 183 hi a awm tling thei lo hrim hrim tiin a ukil ten evidence hrang hrang an neih chu court-in thu tlingah pawmin, Shakira hi thiam a chantir ta a ni.
He thubuai hi kum riat teh meuh an chai hnuah Shakira hian hnehna a changta a, Shakira ukil te chuan court thutlukna chu “thutlukna pawimawh leh chhinchhiah tlak,” tiin lawmawm an tih thu an puang ve nghal bawk.
Shakira pawhin, “Ka hming tihhliau tumna avanga kum riat chuang teh meuh rawng taka intlurbingna leh inentleuna tawng a, zan tam mut theih loh phahna ka neih te chuan ka taksa hriselna leh kan chhungkaw nun thlengin a nghawng a, National Hig Court chuan thudik a awn hai lang ta a ni.
“A thu kal leh haw lam zawng zawng a uchuak thei ang berin an tlangthan zel a, ka hming leh nihna te chu chhiah chawitu dangte vau leh tihthaih nan an hmang zui a. Vawiinah chuan court thutlukna avangin an thu lawilo te chu a thamral ta a nih hi,” a ti.
Audiencia Nacional chuan he case hian 2011-a chhiah inchawitir chungchang chauh a huam thu an tarlang a, Shakira hian hei lo pawh hi Spain chhiah khawntute lakah thubuai a nei tawh a, 2023 khan 2012 leh 2014 inkara chhiah chawi tur (income tax) pek loh thubuai dangah Shakira hi euro maktaduai 17.5 (dollar maktaduai 20) chawi tir a ni a, chhiah a pek tlai avangin fine euro maktaduai 7.3 (dollar maktaduai 8.5) chawi tir a ni bawk. July 2023 khan thubuai dang, 2018-ah pawh a chhiah chawi tur a pe kim lo an ti leh a, mahse, hei hi chu ‘evidence a awm tha tawk lo’ tiin court-in a hnawl sak ta a ni.
Spanish court-in chhiah khawntute hnenah $64M Shakira hnena pe let turin a hriattir
