Indian National Developmental, Inclusive Alliance (INDIA) a tel opposition party te chuan Modi sorkar chu Special Session of Parliament a koha agenda-te tarlang tura ngenin hetih lai hian Congress te chuan parliamentary party chief Sonia Gandhi chuan Prime Minister Narendra Modi hnenah session neih huna an party in sawiho tura an duh te a hrilh hria ang, an ti bawk.
Sonia Gandhi chennaa Parliamentary Strategy Group of Congress thukhawm te chuan Manipur buaina, thil man sang leh unemployment te chu sawihona neih an duh thu thlen ni se an ti a. Hei bakah hian Chinese huangtauna pawh September 18 atanga tan tur ni nga pawh Parliament special session neih turah sawiho an duh thu an thlen dawn thu an sawi.
Sonia Gandhi lehkhathawn tur hi Opposition party 24 tangrual te INDIA bloc hminga kaltir tur tia sawi a ni bawk a.
Congress meeting zawh hnu hian INDIA party floor leader te chuan Congress president Mallikarjun Kharge, Rajya Sabha a Oppositon leader ni bawk chenna inah meeting nei zuiin session neih huna strategy tur an duang lawk zui bawk.
“Modi sorkar hian agenda tarlang miah si lovin Parliament special session a ko a ni. Oposition party atangin tumah rawn an awm hek lo. Hei hi democracy kalpui dan tur a ni lo” tiin Kharge chuan social media platform X-ah a tarlang zui a.
“Ni tinin Modi sorkar hian media lamah ‘agenda’ tarlanga siam zelin mipuite khawih pawimawh tak tak te laka rilru lak pen tumin chet a la zel a ni,” tiin a sawi bawk.
Congress strategy meet-ah hian ‘one nation, one election’ bakah Republic of India tih chu G-20 official invite siama ‘Republic of Bharat’ tih chungchang te, DMK leader Udhayanidhi Stalin an Sanatana Dharma chungchang a sawi te chu sawihona neih a ni.
Union Minister hlui P. Chidambaram, Salman Khurshid leh Rajya Sabha member Abhishek Singhvi te chuan party memberpui te chu dan lam atanga thlirna leh thil ni thei te a ruala inthlan leh ram hming thlak chungchangah an hrilhfiah a.
Sanatan Dharma chungchangah chuan Congress te chuan sakhua tin dahna sarva dharma sambhava chu an kengkawh zui zel dawn tia sawi a ni a. Heng bakah hian issue pawimawh dang inflation leh unemployment, Adani group puhna thar te, Nuh (Harayna) a tharumthawhna thleng thar te, CAG report leh Himachal Pradesh tuilian leh North-East chungchang te chu special session a auchhuahpui tura an chhawp chhuah te a ni hlawm a. Adani Group te laka joint parliamentary committee chhuichianna chu nawr zui an tum thu an sawi bawk.
Congress leader Jairam Ramesh chuan Parliamentary bulletin chuan ni nga chhung chu agenda-ah ‘government business’ tih bakin a dah lo a ti a. “Modi a duh duh sawi ngaithla ringawt turin kan thu mai mai dawn lo. Sorkar kan kar ang a, kan ngaih pawimawh kan sawi ang,” tiin Ramesh chuan a sawi bawk.
Hetih lai hian Trinamool Congress MP Derek O’Brien chuan, “Khawiah nge session agenda chu? Eng vanga tup nge a nih? Hei hi Parliamentary democracy kal dan a ni lo,” tiin a sawi ve thung.
Special Session agenda eng nge tiin zawhna
