Tom Holland leh Zendaya channa ‘Spider-Man: Brand New Day’ chuan tun weekend (Zirtawpni – Pathianni) kalta khan North America-ah cinema hall ticket hralhna atangin dollar maktaduai 145 la lutin, a kar hnih nan box office No.1 a ni. Spider-Man film thar hi film tlangzarh tawh zinga weekend vawi hnihnaa cinema hall ticket hralhna atanga sum la lut tam pathumna a ni a, 2015-a tlangzarh Star Wars: The Force Awakens (dollar maktaduai 149.2) leh 2019 a tlangzarh Avengers: Endgame (dollar maktaduai 147.3) te chiah a pha lo.
Spider-Man: Brand New Day hian an tlangzarh atanga ni 10 chhungin US-ah cinema hall ticket hralhna atangin dollar maktaduai 655 a la lut hman a, North American box office history-ah ni 10 chhunga cinema hall ticket hralhna atanga sum la lut tam ber record a la ni. Brand New Day hian US pawn lama a sum hmuh nen chuan ni 10 chhungin dollar tluklehdingawn 1.67 a la lut hman a, film tlangzarh tawh zinga sum la lut tam 12-na a ni pha der tawh bawk.
Christopher Nolan film siam “The Odyssey”-in dollar maktaduai 31.5 la lut lehin, No.2 a la ni a, he film hian kar li chhungin US-ah dollar maktaduai 461.1 la lut tling tawhin, khawvel huapin dollar tluklehdingawn a la lut tling tawh bawk a, Nolan film siam zingah chuan sum la lut tam ber a la ni a, Nolan film siam dang Batman film ‘The Dark Knight’ leh ‘The Dark Knight Rises’ te pawh a rawn khum a ni.
Film tlangzarh thar, romantic comedy ‘One Night Only’-in dollar maktaduai 5.7 la lutin, No.3-ah a debut a, he film hi Monical Barbato leh Callum Turner te channa niin, New York-a cheng nula leh tlangval kum khata zan khat mahni duh anga chet ‘meh’ phal zana kawppui tur zawng lemah an chang.
Film thar bawk ‘Super Troopers 3’-in dollar maktaduai 4 la lutin, No.4-ah a debut, ‘Super Trooper’ film pathum an tlangzarh tawh zingah opening weekend-a che chhe ber a la ni a. 2001-a a film hmasa ber an tlangzarhin opening weekend-ah dollar maktaduai 6.2 a la lut thei a, 2018-a a film pahnihna pawhin opening-ah dollar maktaduai 15.1 a la lut thei bawk.
Toy Story 5 pawhin dollar maktaduai 3.9 la lut lehin No.5 a la ni a, he film hian kar riat chhungin US-ah dollar maktaduai 470.4 a la lut tling tawh a, US pawna a lak luh nen chuan dollar tluklehdingawn 1.094 a la lut tawh.
Film tlangzarh thar dang Ice Cream Man-in dollar maktaduai 2.012 la lutin, No.8-ah a debut. . Eli Roth flm siam ‘Ice Cream Man’-ah hian Ari Millen, Charlie Zelter, Shiloh O’Rilley, Kiori Mirza Waldman, Sarah Abbott te channa niin, khaw pakhata naupang ten ice cream an ei hnuah bawraw taka an chet zui tak thin dan vel tarlanna a ni.
Box Office Top 10:
1 Spider-Man: Brand New Day $145,000,000
2 The Odyssey $31,500,000
3 One Night Only $5,700,000
4 Super Troopers 3 $4,000,000
5 Toy Story 5 $3,900,000
6 Minions & Monsters $3,500,000
7 Moana $2,800,000
8 Ice Cream Man $2,012,000
9 Invite, The $717,568
10 CatVideoFest 2026 $568,414
‘Spider-Man: Brand New Day’-in weekend vawi 2-naah $145M la lut
