Khawvela streaming service lian ber Spotify chuan kumtluana an streaming platform zaithiam leh hla stream nasat zual te an puang a, Taylor Swift hi zaithiam stream nasat ber niin, Sabrina Carpenter hla ‘Espresso’ chu hla mal anga stream nasat ber a ni bawk. Hei bakah hian Taylor Swift album ‘The Tortured Poets Department’ chu kumina album stream nasat ber a ni bawk.
Swift hi nikum pawh khan kum khat chhunga Spotify-a zaithiam stream nasat ber a lo ni tawh a, a kum zawna hetiang dinhmuna ding thei hmasa ber a ni. Kumin hian khawvela huapin Swift hla hrang hrang stream hi tlukledingawn 26.6 a tling a, Spotify-a kumina zaithiam stream nasat ber niin, The Weeknd, Bad Bunny, Drake leh Billie Eilish ten an dawt.
Rimawi khawvela Sabrina Carpenter lar chhuah tak takna hla ti a sawi theih ‘Espresso’ chu kumina Spotify-a hla stream nasat ber a ni ve thung a, vawi tluklehdingawn 1.6 stream a kai thei a, Benson Boone ‘Beautiful Things’, Billie Eilish ‘Birds of a Feather’, FloyyMenor leh Cris Mj ‘Gata Only’ leh Teddy Swims ‘Lose Control’ ten an dawt.
Taylor Swift album ‘TTPD’ chu kumina Spotify-a album ngaithlatu ngah ber niin, Billie Eilish ‘Hit Me Hard and Soft’-in a dawt a, Sabrina Carpenter ‘Short n’ Sweet’ chu pathumna niin, Karol G ‘MANANA SERA BONITO’ leh Ariana Grande ‘Eternal Sunshine’ te top 5-ah an lang bawk. Taylor Swift ‘TTPD’ hi streaming service dang Apple Music pawhin 2024-a album stream nasat berah an lo puang tawh bawk a ni.
Spotify No.1 artist Taylor Swift No.1 song ‘Espresso’
