December 7, Nngani zan khan English Premier League 2023-24 khelh chhunzawm a ni a. Inkhel hmuhnawm takah West Ham United chuan muanleitu Tottenham an hneh. Tottenham laka an chakna hi West Ham manager David Moyes chuan hnehna an chan lian ber ni hial a hriat thu a sawi. Inkel dangah Everton in awlsam takin Newcastle United an hneh a, regelation zone an chhuahsan.
Tottenham hian an muala an mikhual West Ham United lakah an khel chhe lo viau a, goal pawh an thun thuai. Inkhel tan atanga minute 11-na lekah defender Cristian Romero chuan Pedro Porro corner pet tha tak chu far post, top corner-ah a tauh goal a, hmahruaina goal a thun. An mikhual lakah goal an thun thuai vangin Tottenham an phur a, an mualah chak ngei turah inngaiin, inrintawkna sang zawk nen an inlan chhunzawm.
Hma takah goal thun mah se Spurs in goal an thun belh mai thei lo va, West Ham in an si phurh an sut thei lawk lo bawk a, chawlhlawk hmain goal lut a awm belh thei lo phawt.
Chawlhlawk hnu lamah mikhual team an huangtau a, tha taka bul tanin goal an thun thuai. Minute 52-naah Hammers hi an vannei a, Spurs defender an pet per vangin Jarrod Bowen chuan goal thun theihna hun tha a neih theih phah. A hun tha neih a chhawr tangkai a, chiang zeta pet goal in Bowen hian an si phurh a sut.
1-1 a nih hnuin inkhel a hmuhnawm zual sauh a, goal thun tumin an innawr tawn nasa hle. Goal an thun belh theih lawk loh hnuin hun tawp dawn hnaihah West Ham an vannei nawn leh. Spurs defender Destiny Udogie chuan an si nghak ball a pe a, a tisual. He ball hi West Ham tlarhma ten changin si nghak an tibuai hman. Ball per let leh hi James Ward-Prowse chuan pet in goal post a pet per a. Si nghak Guglielmo Vicario a tluk tawh vangin James Ward-Prowse hian awlsam takin goal ruakah a pet zui leh ta tho a, hma an hruai letna goal a thun.
An mualah hnufual zawk an nih hnuin Tottenham in an si phurh sut tumin tan an khawh zui chiam naa goal dang an thun belh thei lo. An si phurh an sut theih loh vangin an mualah ngei uiawm takin an tlawm zui ta a ni. An mualah an tlawm leh tak vangin Tottenham in an khel chhe zawn viau a, khelh nga chhung an chak thei lo zawn tawh a, hei hi kum 2019 hnu lamah an chak loh zawn rei ber niin, record duhawm lo an hnutchhiah.
Thla khat liam ta mai kha chuan Tottenham hi match 10 atanga vawi riat hnehna changin EPL hmahruaitu an ni hman hial a. Vawi 11 an khelhnaah an tlawm a, chumi hnu lamah chak ni hmel an la hmu leh ta miah lo va, hmahruaitu ni hman thuak thuak kha tunah chuan panganaah an tlahniam hial tawh a ni.
Team lian Tottenham lakah hnehna lian an chan vangin West Ham in hma lam an pan a, pakuanaah an awm mek. Hammers hi pakuanaah daih awm mek mah se an chunga awmte nen an inhlat lo hlawm viau a, panganaa awm mek Tottenham nen point thum chiahin an inthlau mek a ni.
Everton an chak nuamsa
Ningani zana inkhel dangah point 10 zet paihsak an nih vanga tlahniam thei dinhmuna ding hman Everton chuan Goodison Park-ah champions League khel phak mek Newcastle United an mikhual a, an mualah si thum fai ngawta hnehna changin relegation zone an chhuahsan zui nghal.
Relegation zone chhuahsan tura an muala chak mamawh Everton hian an mikhual Newcastle United lekah si thum fai zetin hnehna an chang naa goal erawh an thun har viau thung. Hun rei tak chhung goal lut a awm theih loh hnuin hun tawp dawn hnaih minute 79-naah Dwight McNeil chuan hmahruaina goal a thun ta nge nge.
Goal hmahruai an thun hnuin an khel tha zual sauh a, goal dang an thun belh leh thuai. Minute 86-naah Abdoulaye Doucouré chuan an goal hnihna a thun a. Si hnih faia hma an hruai hun pek belh minute 90+6-ah Beto chuan an goal thumna a thun zui leh zat a, an mualah si thum fai a hnehna changin, hnehna lian an sualchhuak zui ta a ni.
Newcastle sawptu Everton hian khelh 15 atangin point an paihsak zat point 10 an hmu a, 17-naah inhlangkaiin regelation zone an chhuahsan chiah chiah a. Champions league khel mek Newcastle United hian khelh 15 atanga point 26 hmuin pasarihna an luah ve thung
Spurs hnehtu Hammers
