Spurs-in Stellini banin Mason chhawr rih dawn

Spurs-in Stellini banin Mason chhawr rih dawn
Antonio Conte dam loh laia Tottenham Hotspur lo kaihruai ve nual tawh, Conte managerial staff langsar ni thin Cristian Stellini kha interim coach atang Spurs-in an chhawr zet a, mahse, kum 48 mi hnuaia north Londoners an chetfuh theih chuan loh avangin Newcastle United khelmuala 1-6-a an tlawm hnu lawk khan Stellini pawh chu an ban ve leh ta tih Thawhtanni khan Premier League club thuchhuah chuan a tarlang.
Magpies laka an chak loh leh tak hnuah he thu buatsaih lai thlengin Tottenham hian league table-ah pangana luahin, an chung chiaha palina luahtu Manchester United lakah point rukin an hniam tawh a, top four nena season khar beiseina a tlahniam duai tawh a, coach lailawk atana an rawih pawh an chhawr zui ngam ta lo a ni.
Zaipui a tawh avanga Conte chawlh lai khan Stellini hian Spurs chu Manchester City, West Ham United leh Chelsea lakah a lo chakpui ve tawh a, a laka rinna an nghah hman vuai vuai laiin ban a tawk zui leh ta a ni.
Assistant coach Ryan Mason chu kum 31 mi lek ni chungin Spurs hian manager nghet an hmuh hma atan head coach hna an chelhtir nghal.
London club hian manager nghet zawn an ngaih bakah tunthla veka bang ta director of football Fabio Paratici thlaktu tur pawh an dap tel a ngai.
Tarlan tawh angin, league table-a palina an la luah lai thla hmasa khan Italian Stellini chuan a chipui Antonio Conte thlakin White Hart Lane-ah head coach hna a chelh a, mahse, St James’ Park-a chiang mangkhenga an tlawm hnu khan khel tam zawk chungin Newcastle leh Manchester United lakah point ruk ve vein an hnufual a, interim manager Stellini chuan a tuar leh ta a ni.
Tottenham club chairman Daniel Levy chuan thuchhuah siamin, “Pathiannia Newcastle laka kan khelh dan kha engti kawng mahin pawmzam theih a ni lo a, chhiatna hmuh hrehawm tak a ni.
“Kha thil thlen chhan kha kil hrang hrang atangin kan thlir a, keimah bakah Board, coach rual leh player zawng zawngin a huhoin mawh kan phur vek tur a ni a, a biktakin ka mawh-phurhna a lian zual.
“Cristian-a hi season kal laia hun harsa kan tawh lai taka lakluh niin, tunah min chhuahsan mah se chona lian a hmachhawn chhunga professional chet-na avangin ka lawm a, amah leh a coaching staff pumpui chungah lawmthu ka sawi a ni,” a ti.
Cristian Stellini hmun-ruak luah tura coach lailawk atana ruat Mason tan tun hi interim coach hna a chelh tum hnihna ni tawhin, Spurs leh Jose Mourinho inthen lai April 2021 khan interim manager atan hian chhawr a lo ni tawh bawk.
Bayern Munich coach Julian Nagelsmann chu pawisa thaptu (bookmaker)-te’n Tottenham boss thar ni turin an tinzawn huai viau a, hetih lai hian tun season Premier League-a Burnley hruaikirtu Vincent Kompany hming pawh sawirik rin zingah a tel.
Dutch club lar Feye-noord boss Arne Slot leh Leicester City manager hlui Brendan Rodgers-te pawh he hna chelh tura rinkai zingah an tel.
British media lam chuan kum 2019-a Champions League final khelhpuitu Spurs boss hlui Mauricio Pochettino kha Tottenham hmelma lian Chelsea nen an inbe mek tih an tarlang.
Spurs hian naktuk zanah Man-chester United an mikhual ang a, he hunah hian manager lailawk Ryan Mason chuan north Londoners lakah team a kaihruai ang.