March 5, Ningani zan khan English Premier League 2025-26 khelh chhunzawm a ni a, inkhel awmchhunah Tottenham Hotspurs chu an mikhual Crystal Palace hneh lovin an tlawm. An mualah an tlawm leh tak vangin Tottenham dinhmun a chhe leh zual a, tlak hniam an hnaih deuh deuh zel.
EPL-ah an khelh hnuhnung pangaa hnehna chang thei tawh lo Tottenham hi table-ah an tlahniam chak viau a, 16-naah an awm mek. Tlahniam thei dinhmuna ding mek West Ham United nen point khat chauhin an inthlau. Dinhmun chhe taka ding chungin khelh hmabak pakua chauh an nei tawh bawk si a, an dinhmun a him lo leh zual. Tlakhniam an hnaih zel vangin chak an mamawh hle a, an mualah chak tumin tan pawh an khawh nasa hle. Chak mamawh Tottenham hian goal thun hmasa bawk mah se hma takah Micky van de Ven hnawhchhuah a nih vangin an dinhmun khirh zawkah an ding a, goal thum ngawt an chhuah zui ta hial a ni.
Chak tuma tan khawh Tottenham hian goal thun ngei tumin an mikhualte an nawr a, bul an tan tha lova goal chhuah hmasa zawkah an tang. Crystal Palace goal thun hi VAR rawn a nih hnuin hnawl a ni a, Spurs an him hlauh. An him hlauh hnuin an khingpuite fuh takin an nawr tlang zui a, Archie Gray siamsak tha tak chu Dominic Solanke chuan minute 34-naah hmahruaina goal a thun a, an mualah chak theih beiseina sang zawk an nei.
Hmahruaina goal an thun vangin phur viau mah se Tottenham an phur rei lo viau thung. Goal an thun atanga minute li hnu lekah Spurs defender Micky van de Ven chuan box chhungah Palace forward Ismaïla Sarr a pawt thlu a, penalty a chawi. Penalty a chawi bakah Van de Ven hi hnawhchhuah a ni tel bawk. A hlawhchhuah penalty hi Ismaïla Sarr chuan awlsam takin a pet goal a, an si phurh a sut.
Goal khat ve ve an thun hnuin inkhel a hmuhnawm zui viau a, Crystal Palace an phur a, an inrintawk viau laiin Tottenham an chiai a, an talbuai tak zet thung. An khingpuite an talbuai lai chuhin Eagles hian na takin an khingpuite an nawr a, inhnaihchilh takin goal hnih an thun belh zui leh zat bawk. Phur taka inlan Crystal Palace hian Tottenham tlarhnung ball inpek fuh tawk loh vangin an khingpuite an nawr let thut a, goal thun theihna hun remchang an nei. Chiang taka Spurs tlarhnung an thiah hnuin Jørgen Strand Larsen chuan Tottenham si nghak Guglielmo Vicario kap karah fing leh fuh takin a pet goal a, minute 45+1-ah hma an hruai letna goal a thun.
Hma an hruai let hnuin Crystal Palace an inringtawk sauh a, phur zual zawkin an khingpuite an nawr zui zel bawk. Na taka an khingpuite nawrtu Crystal Palace hian long ball fing tak hmangin an khingpui tlarhnung an thiat nawn leh. Fuh taka an khingpui tlarhnung an thiah hnuin an si phurh sutna goal thuntu Ismaïla Sarr chuan minute 45’+7-ah awlsam takin a pet goal a, an goal thumna a thun zui leh zat a. 3-1 a hmahruai let chungin chawlhlawk an hmang.
Chawlhlawk hnu lamah inkhel a hmuhnawm zui viau a, Tottenham in an si phurh sut tum viau mah se tlem zawk an nih vangin an tan chet a harsa a, hun tawp thlengin goal an thun belh thei tawh lova, an mualah mualphoin an tlawm a, tlakhniam an hnai deuh deu zel. Hetihlai hian Crystal Palace erawh chuan hma lam an pan ve thung a, an him ngei dawn niin a ngaih theih tawh.
Europa League-a champion lai, London club lian Tottenham hian EPL season kal mekah vawi 29 an khel tawh a, point 28 hmuin 16-naah an awm zui ze a, an dinhmun a chhe zual deuh deuh zel.
Spurs in tlakhniam an hnaih
