English Premier League 2023-24 round hnihna chu Inrinni zan leh Pathinni zan hian khelh chhunzawm a ni leh dawn a. Tottenham Hotspurs in Manchester United an mikhual tur chu kar tawpa EPL inkhel ngaihven hlawh ber a ni ang a. Manchester City leh Newcastle United in hmachhawn tur pawh inkhel pawimawh tak a ni bawk ang.
Inrinni zan hian inkhel panga a awm dawn a. Point khat hmu tawh Liverpool in Anfield-ah an mahni ang thova point khat hmu tawh AFC Bournemouth an mikhual dawn a, Reds hian an mualah point thum an hmu thei tura ngaih a ni.
Zan dar 10:00-ah London club lian Tottenham chuan an mualah Manchester United an mikhual dawn a, point thum hmu turin fiahna hautak an hmachhawn a ngai dawn. Manager thar leh captain thar hnuaia bul tan Spurs hian an match hmasa berah an khel tha tawk lova, Brentford nen 2-2 in an inhnehtawk. Brentford an hmachhawn tum hian an player pawimawh Harry Kane awm lo an tuar hle a. United lakah pawh Kane hmunruak hnawhkhah an harsat zui rih tura ngaih a ni.
Tottenham muala lenglut tur Manchester United in an khelh hmasak berah point thum hmu nghal bawk mah se an khel tha tawk bik lo. Old Trafford-a an mikhual Wolves lakah chak phu zawk an ni thei bik lo. Hun tawp dawn hnaihah goal thun hram bawk mah se penalty chawi ngei tur an ni a. Penalty chawitir an nih loh vangin Wolves nen an inkhelh tuma match official pathum ngawt chu hrem an ni hial a, kar tawpah inkhel a enkawl ve theih loh phah. Wolves lakah an khelh that loh vangin Tottenham hi an tan fiahna tak tak tur anga ngaih a ni a. Spus hmaa an inlan dan hi season thar an hlimthla tur hril theitu ni thei tura ngaih a ni.
Spurs leh United an intawn hnuhnung vawi ngaah United vawi li an chak a, Spurs hian chak an nei lo. Tunhnaiah United hi an ngam lo rih viau.
Tottenham leh United inkhelh zawh hnu, zanlaiah champion lai Manchester City chuan Etihad Stadium ah khel tha tluang tak Newcastle United an mikhual ve dawn bawk. Champion lai leh champion leh tura rinkai ber City hian an khelh hmasak berah Burnley chu si thum faiin an sawp nghal a. Newcastle pawhin an khelh hmasak berah an khingpui Aston Villa chu 5-1 ngawtin an sawp ve bawk.
Spurs mikhual tur United
