Tuichangralin an nghah thlawn fo tawh an duhthusam tihhlawhtlin ngei tumin hma an la a, a vawi khatna’n Pro Volleyball League champion ni thei turin ram dang player lakluh theih an inbeisei a, Sri Lanka player tha lam an hawi mek.
Kum 2016-a Pro Volleyball tan a nih hnu kum 2018 khan Mizoram volleyball inelna sang berah Tuichangral inlan ve tanin, Aizawl pawn atanga tel hmasa ber an nih bakah boruak an nei nghal a, final lutin Hunthar an hneh lo a ni.
Tla loin Pro Division-ah an awm zui char char a, kum 2024 khan a vawi hnihna’n Pro Volleyball final lut lehin Huntha r lakah bawk an tlawm leh!
Season liamtaah Mizo player langsar kawl khawmin champion ngei tumin team an din a, league-a sang ber niin rin hlawh mah se semi-final stage-ah Thutak Nunpuitu Team hneh loin an tla a ni.
Season liamta khan Tuichangralin Pro Volleyball atan Rajnesh Singh lalutin Mizo player tha Zomuansanga, Johan Vanneihsanga, Vanlaltanpuia leh setter C. Zonunmawia an kawl a, team tha tak ni chungin final an lut zo lo.
Manager David Aizampuia chuan tun season-ah nikum anga Mizo player langsar an nei tawh lo tih a sawi rualin team tha tak erawh an la ni reng a, champion ngei tumin an bei dawn tih a sawi.
Mizo spiker tha pahnih Zomuansanga leh Johan Vanneihsanga’n an chhuahsan bakah setter C-Tea’n Chhinga Veng Spikers a zawmsan tawh bawk a, chutih rualin nikuma TNT-a khel Saidingpuia Sailo an lakir ve thung.
David-a chuan squad tichak turin Sri Lanka player tha, Europe-a inkhel mek lakluh tumin an dawr a, visa an tifel thei a nih chuan Tuichangral tan a khel thei dawn tih a sawi a, kum kalta angin player malkhaia langsar nei tam lo mah se team tha leh trophy chuh phak an nih theih ngei a ring a ni.
Tun thla atangin mumal leh zualin Joint YMA Indoor Stadium, Vaivakawnah Tuichangral an inbuatsaih a, mipa team mai bakah a vawi khatna’n hmeichhe team nen Pro Volleyball-ah an tel kawp dawn a; season hawnna tournament nikum September thla khan Tuichangral hmeichhe team an champion nghe nghe a ni.
Pro Volleyball vawi kuanaah hian mipa team sarih leh hmeichhe team li an inel dawn a, May ni 11, Thawhtanni zanah LPS Arena, Falkland-ah tan a ni ang.
Sri Lanka lam lama bazar tum Tuichangral!
