Croatian nula Dina Levacic chuan Saint Helena tuia hleuh chunga hel chhuak rang thei ber record a siam. St. Helena hian larna tak a neih pakhat chu khawvel thil nung damlai zinga upa bera an puan lai, satel upa mangtara Jonathan-a chenna a nih vang a ni.
St. Helena hi South Atlantic Tuipuia thliarkar kilkhawr ve tak a ni a, Dina hian St. Helena chu a hleuh hual ta a, darkar 17 le minute 13 leh second 28 chhungin a hleuh hual hman a, hmeichhe zinga he thliarkar hlauh hel chhuak rang thei berah Guinness World Record-in a puang.
St Helena tliarlar hi km 16 a sei, km 8 a zau niin, tuia hleuh kual tur hi chuan km 60 tal hleuh ngei ngei a ngai. PhD student Dina, kum 30, hian kumin February thla khan record siam tum hian a hleuh ta a, Guinness lamin a record siam pawmna hi kar kalta khan an tichhuak ta a ni.
Dina hian inpuahchah nan pool a hmang deuh ber a, kartin km 70 tal tui a hleuh thin a, hei bakah hian gym lamah a kal bawk thin. Hmeichhe naupang kum li mi a nih lai atanga tui hleuh thiam tawh a ni a, tui hleuh lama thil harsa leh khirh tak tak te pawh lo ti ve chhin deuh nual tawh a ni bawk.
Dina hi St Helena hleuh hel chhuak hmasa ber a ni a, mipa lamah chuan Angus McPherson (South Africa) chuan March ni 10 khan a hleuh hel tawh a, darkar 20 leh minute 2 leh second 14 hun a hmang a, Dina aiin hun a hmang rei deuh a, Ryan Stramrood (South Africa) chuan March ni 19 khan hleuh ve lehin, darkar 16 leh minute 50 leh second 42 chhungin a hleuh chhuak a, ani hi St Helena hleuh hel rang thei ber record siamtu a ni ta rih a ni.
St Helena hleuh kual rang thei ber
