Sawrkar term kal meka stamp duty lak dan her rem a nih hnu, kum hnih chhungin cheng vaibelchhe 33 chuang hmuh a ni a. Sawrkar chuan non judicial stamp paper aiah e-stamping hman tumin a inruahman mek zel. Ram lei leh hralh bakah inremna hrang hrang siamna atana hman thin, non judicial stamp paper aiah e-stamping hman a nih theihnan Thawhtanni khan Land Revenue & Settlement department leh Stock Holding Corporation of India chuan thawhdunna thuthlung an ziak a. Mizoram sawrkar aiawhin LR&S secretary Vanlalmawia leh SHCIL aiawhin regional manager (East & North East) Pritesh Kumar ten hming an ziahhnan.
LR&S minister B Lalchhanzova chuan, ram emaw in leh lo emaw lei leh hralh bakah mimal leh pawl inkara inremna siam nemnghehna atan non judicial stamp hman chu sawrkarah register thin a ni a. Inremna azirin stamp duty chawi a ngai a, stamp duty chu lehkha (paper) a lei thin a ni, tih a sawi.
Stamp paper awmsa a zawh chang, denomination mamawh ang a awm loh chang a awm bakah stamp paper lem (fake) siam an awm thin avangin, heng harsatna nuaibo a nih theihnan 2024 June 2 khan sawrkar chuan The Mizoram Stamp Rules siamtha in electronic hmanga stamp duty pek phal a ni a. Chumi bawhzuina atan thawhdunna thuthlung hi ziah a ni tih a sawi a ni.
Stamp duty chu state sawrkar chan liau liau a nih angin, a lakkhawm kawngah thahnemngaih a tul tih Revenue minister hian sawiin, 2024- 2025 a stamp duty tlingkhawm chu cheng vaibelchhe 13.45 a ni a, 2025- 2026 ah vbch. 20.2 ah pungin, sawrkar kum kal mek 2026- 2027 chhungin Finance department chuan stamp duty atangin vbch. 22.5 a bituk a, e-stamping hman a nih dawn tak piahlamah sub division level-a Sub Registration Office hawn a nih tawh avangin Finance department bituk zat hi khum ngei an inbeisei tih a sawi.
Stamp duty lak chungchangah e-stamping hmang tura department-in hma an lakna kawngah harsatna hrang hrang an tawk a, tuna a hlawhtlinna an hmu chho chu LR&S department-a a thawhpuite thawhrimna rah a ni tih a sawi a ni.
e-stamping bultanna atan pilot project Aizawl district-ah kalpui a ni dawn a. A tahtawlin district dangah pawh kalpui vek tum a ni. Pilot project hi ni 45 chhunga tihfel tura duan a ni a. A hlawhtlin hunah mahni awm hmunah emaw accredited collection centres atangin emaw stamp duty pek theih a ni dawn. Hei bakah hian stamp indaihlo leh chatlak a awm tawh dawn loa, stamp duty hralhna leh leina bothlau pawh a nuaibo dawn a ni tih SHCIL hotu hian a sawi.
Stamp duty-ah cheng vbch.33 e-stamping hman theih dawn
