Prime Minister Narendra Modi-an Congress party te chuan ‘hausakna an semzai dawn’ tia a sawi chu April 24 a campaign hun tawp ta Lok Sabha inthlan thawh hnihnaa high-voltage campaign a chhinchhiahtlak zual lai a ni.
April 26-a inthlanna neih turah State 13 ah seat 88 inchuh a ni dawn a. Inthlang turah Kerala state seat 20, Karnataka a seat 28 ah 14, Rajastahan-ah seat 13, Maharashtra leh Uttar Pradesh ah seat riat, Madhya Pradesh ah seat ruk, Assam leh Bihar ah seat nga, Chhattisgarh leh West Bengal-ah seat thum, Manipur, Tripura, Jammu and Kashmir ah seat khat te inthlanna neih a ni ang.
Madhya Pradesh a Betul seat April 26 a inthlang tura ruahmansa tawh chu Bahujan Samaj Party (BSP) candidate Ashok Balawi a thih avangin inthlan thawhthumnaah neih tura sawn a ni bawk.
April 26-a inthlanna neih turah candidate hming langsar deuh te chu Congress leader Rahul Gandhi leh Shashi Tharoor, Union Minister Rajeev Chandrasekhar, BJP hotu Tejasvi Surya, leh actor-turned politicians Hema Malini leh Arun Govil te an ni.
Tuna seat 88 inthlanna neih turah hian inthlan hnuhnung berah khan BJP te chuan seat 52 lai an lakna a ni a. Congress-in seat 18 la in, Janata Dal (United) leh Shiv Sena te chuan seat li ve ve an la a, Muslim League ten seat hnih, BSP, Communist Party Of India (Marxist), Revolutionary Socialist Party, Kerala Congress (M) leh Janata Dal (Secular) ten seat khat theuh an la a ni.
Lok Sabha inthlan thawh hnihna campaign-ah khan PM Modi chuan Banswara, Rajasthan a rally a neihnaah Congress manifesto a bei na hle a.
April 21 khan Congress te chuan mipui ten hahtaka an thawhchhuah sum te chu ‘ram dang mi lo lutru’ leh ‘fa ngah zawk’ te hnenah sem an tum a ti a, hei hi PM Modi hian Muslim te a sawina a ni. Chumai bakah Prime Minister hlui Manmohan Singh chuan kum 2006 a thusawina a neihah Muslim te chu India ram resource dawng hmasa ber tur a ti tiin a sawi bawk. PM Modi thusawi hi factcheck a nih hnuah Manmohan Singh thusawi a kaihlek leh a duhlai chauh thurchhuakin a pumpuiin a thusawi chhan kalkan daih siin a kaihlek tih finfiah a ni.
Congress te chuan Election Commission ah April 22 ah Modi thusawi laka hremna lekkawh turin hma an la nghal a. Prime Minister chuan sakhuana leh sakhuana symbol te chu sakhaw hrang te inbeihna thlentir tumin a hmang a ni an ti.
Mahse, PM Modi chuan a tuk lawk April 23 ah Congress te chu thuneihna an chang a nih chuan mipuite property te chu semzai tumah a puh leh a, mipui te sum leh pai te chu Muslim te hnenah an sem dawn tifakin a sawi thleng lo chauh tihmai a ni.
Nilaini khan Prime Minister chuan Chhattisgarh a Surguja a rally a neihnaah Congress leader leh US a inbun meka overseas wig president nimek Sam Pitroda an ‘inheritance tax’ a sawi chu beihlet nan hmang bawkin Congress te chuan ‘wealth distribution’ kalpui an tum tiin a sawi nawn leh zui a ni.
April 26 hian Kerala, Rajasthan leh Tripura te chu inthlan thawh hnihnaah an inthlang zo fel tawh dawn a. A hma in Tamil Nadu, Uttarakhand, Arunachal Pradesh, Meghalaya, Andaman and Nicobar Islands, Mizoram, Nagaland, Puducherry, Sikkim leh Lakshadweep ah te inthlan neihzawh fel a lo ni tawh a ni.
Lok Sabha inthlan chu thawh sariha neih tur niin thawhkhatna chu April 19 khan State leh UT 21 la seta 102 ah neih a lo ni tawh a. Kum 2019 inthlan aiin vote tla a tlem zawk a, thawh thumna chu State leh UT 12 ah seat 96 ah May 7 ah neih a ni leh ang.
State 13-ah LS seat 88 inthlang dawn
