State chhunga buh thar qtl.1399 leikhawm tawh
ZPM sawrkar hnu ah sawrkarin Mizorama buh thar chu a humin quintal 1399.61 a lei sak tawh.
ZPM Thalai Hqrs hruaitute chuan an president Jeje Lalpekhlua, MLA hoin Thawhtanni khan Kolasib Pangbalkawna ‘Om Om Rice Mill’ an tlawh a. An ni hi tualchhung thar buh hum lei tura sawrkarin a thlan a ni.
ZPM Thalai president chuan, ZPM chu kum khat awrh chauh la sawrkar mah se, hemi hun chhung hian mipui tana chhenfakawm tur project chhuanawm leh fak tlak khawpa hmachhawp lian tak tak a nei tawh tih a sawi a. Chu’ng zinga, Mizorama buh thar a pun theihnan leh man man zawka a chingtuten hlawkna an hmuh theihnana sawrkar hmalakna pakhat, Om Om Rice Mill an tlawh thei chu lawmawm a tih thu a sawi.
He project hlawhtlin theihna tur hian sawrkarin ‘Paddy Procurement Policy’ a duang a, he policy kaltlang hian Kolasib leh Mamit district-a buh thar (buhhum) chu a bul tanna atan sawrkarin kg ah Rs.30 zelin Om Om Rice Mill Pangbalkawn kaltlangin 2024 December 19 atangin a lei tan tih a sawi bawk.
Tun dinhmunah loneitute buh thar quintal 1399.61 sawrkarin Om Om Rice Mill kaltlangin a lei tawh a. He Rice Mill hi darkar khata ton 5 buhhum her thei tura ruahman a nih laiin, an her daih khawpa tam an la hmu loa, loneitute a tam thei ang ber buhhum hralh thei khawpa buh ching uar deuh deuh turin a chah tih Jeje Lalpekhlua hian a sawi. Loneituten man man zawka an buhhum an hralh a, Mizo buh thar ngei hralhchhuah a nih theihnana hma latu chief minister Lalduhoma, Agriculture minister PC Vanlalruata, Supply minister B Lalchhanzoa leh sawrkar hmalakna fakawm a tih thu a sawi a ni.
ZPM Thalai hruaitute hian Bairabi Police Checkgate leh rel station bakah Baibrabi-a FCI Kudam tlawh nghalin, Bairabi FCI Kudam-ah hian buhfai stock sa, metric ton 4600, thla thum tla a awm mek tih thawktuten an lo hrilh a ni.
State chhunga buh thar qtl.1399 leikhawm tawh
