Nimina State Day of Prayer, Lammuala hman chungchang ZPM Media & Publicity Department thuchhuahah, chief minister thusawi, ‘Pathian hmaa kun thin ram hruaitu leh sorkar hnathawk kan mamawh’ tih tarlan a ni a.
Nikum khan State Day lawmnaah ‘sual thupha chawi tawngtai’ neih a lo ni tawh bawk a. Kan ram hi, ‘thupha chawi reng ngaia sual reng’ dinhmunah kan ding ni te hian a hriat a; a nihna chin te pawh a lo awm maithei bawk e. Thupha chawi reng ngaia sual reng si te hi Siamtu hian eng tin nge a tih ang? tih hi ngaihtuah theih tak a ni a; Sodom leh Gomora dinhmunte pawh a ngaihtuah theih ang.
Chief minister thusawia lo lang, ‘Pathian hmaa kun thin ram hruaitu leh sorkar hnathawk kan mamawh’ tih atang hian Mizoram dinhmun tur awm-ang chu a rin hriat theih mai awm e. Mamawh a nih hi chuan, kha mamawh kha kan tlachham tihna a ni a. Kan tlachham a nih chuan, tlakchham phuhrukna tur ngaihtuah a ngai tihna a ni.
Mizoram hi Kristian ram tia chhal ngam a ni a, Pathian biak (worshiping) pawh urhsun taka kalpuina ram a ni a, Pathian thu zirna sikul (Sande Skul) phei chu, dam chhung daih ‘course’ kan nei a ni. Chumi awmzia chu ‘Pathian hmaah hian kan kun ngun hle’ tihna a ni. Mahse, heti chung hian, chief minister chuan ‘Pathian hmaa kun thin ram hruaitu leh sorkar hnathawk kan mamawh’ a ti mauh mai si a, chawlhkar khat chhunga Biak ina chhun leh zana inkhawmnaah te hian Pathian hmaah kan kun thin, ram hruaitute leh sawrkar hnathawk chinte phei chu Biak in rawngbawlna lamah phei chuan a meizang hlaptu ni pha chin an ni tlangpui awm e. Pathian hmaah hian a kun chu kan kun nasa viau ngei ang, mahse kun dan ‘quality’ erawh a inang lo hle dawn tihna a ni. A chhan chu, ‘Pathian hmaa kun thin’ tihah hian ‘kun satliah’ leh ‘kun tak tak’ a inpawlh nasa dawn hle tihna a ni ber awm e.
Ram hruaitu leh sawrkar hnathawkte hi Pathian hmaah an ‘kun tak tak’ a nih chuan, ‘corruption hi a reh daih tawh ang’ a tih theih mai awm e. Mahse, corruption hi chu a reh der si lo, a hluar tulh tulh ni te hian a la lang zui a. Ram hruaitute leh sawrkar hnathawk zingah Pathian hmaa kun tak tak kan mamawh a nih chuan, chu chu eng tia tih tur nge ni dawn ta? Pathian hmaa kun tak tak lo chinte hi chu an in leh lo din dan leh khawsak phung atang hian a tinzawn theih deuh ruakin a rinawm a, chung mite chu ‘kun tak tak rawh u’ kan ti ngawt mai dawn em ni ta ang le?
State Day of Prayer leh a behbawm…
