State Human Rights Commission chairperson leh member 2 ruat

Mizoram sawrkarin a din tawh State Human Rights Commission enkawltu tur chu sawrkarin a ruat fel a. Chairperson atan Marli Vankung a ruat a, member pahnih ruat nghalin sawrkar hna atanga chawl tawh tho Vanlalenmawia leh K Lal Nghinglova a ruat nghal bawk.
Mizoram State Human Rights Commission (SHRC) hotute hi larsap Gen. Vijay Kumar Singh (Retd) chuan Nilaini khan rinawmna thu tiamtirin a lalut a. Lakluhna inkhawmah hian chief secretary Khilli Ram Meena chuan larsap-in Mizoram SHRC hotu atana a ruatna notification a chhiarchhuak hmasa a. Lakluh inkhawmah hian chief minister Lalduhoma, speaker Lalbiakzama, cabint minister pahnih Vanlalhlana, lehLalthansanga, leader of opposition Lalchhandama Ralte, minister of state – F Rodingliana, leh B Lalchhanzova bakah sawm bik midangte an tel a ni.
SHRC chairperson Justice Marli Vankung hi 1964 March 4-ah a piang a, zirna lamah BA (English Hons), LL.B leh M. Phil (International Legal Studies) niin, kum 1989 khan Mizoram Judicial Service a zawm a. Mizoram sawkarah post hrang hrang a chelh hnuin 2021 October 13 khan Gauhati High Court additional judge-ah hlankai a ni a, 2023 August 1 khan permanent judge atan ruat a ni. Kumin March 3 khan superannuation pension-in a chhuak a. Tunah hian Republic Veng Aizawlah a pasal fanaute nen an cheng a ni.
SHRC member atana lakluh Vanlalenmawia hi 1966 April 1-ah piangin zirna lamah BA, LLB degree nei a ni. Kum 2011 khan Mizoram Judicial Service zawmin Mizoram sawkarah post hrang hrang tak a chelh hnuin, kumin March 31 khan Motor Accident Claims Tribunal Aizawl presiding officer a nih laiin superannuation pension-in a chhuak a. A nupui fanaute nen Tuithiang Aizawlah an cheng mek.
SHRC member K Lal Nghinglova hi 1956 December 1-ah a piang a. Zirna lamah BA (Hons) a ni. Kum 1983 khan District Information & Public Relations officer hna zawmin Mizoram sawkar hnuaiah a thawk a. Hemi hnu hian Indian Administrative Service (IAS) zawmin AGMUT cadre 1996 pek a ni. Mizoram leh Delhi sawkar hnuaia post hrang hrang a chelh hnuin Mizoram sawrkarah principal secretary-in 2016 November 30 khan superannuation pension-in a chhuak a. A nupui fanaute nen Ainawn Veng Aizawlah an cheng.