Mizoram leh Manipur inkalpawhna kawng, Tuivai lei dawh chu zawh a ni a, a hminga ‘Unity Bridge’ tia vuah hi Inrinni khan chief minister Lalduhoma’n a hawng. Chief minister chuan Tuivai lei hi kum 1990 khan tuilianin a tichhia a, dawhthat a nih hnuah kum 1997 khan a tumhnihna atan tuilianin a tichhe leh a, kum 1997-a a chhiat hma zawng chuan he kawngpui hi Mizoram leh Manipur inkalpawhna kawng pawimawh ber ni thinin, inter state bus pawh tlantir a ni tih a sawi. Kum 28 chhung hman theih loha a awm hnuah sawrkar thar chuan mutmawh hnarmawhah neihin kum khat chhungin an dawh kai leh ta a. Zofate inlaichinna tinghettu a nih an beiseia avangin a hming atan pawh ‘Unity Bridge’ an vuah tih a sawi a ni.
Manipur-a Zofa unauten harsatna an tawk a, an mamawh engkim Mizoram lam atanga lakluh a tul a, Sinzawl lam kawng chauh chu kumtluana hman theih awmchhun a ni si a. Tuivai lei siamthat hi a tul tak hle avangin Ministry of Road Transport & Highways-in permanent-a dawh tumin hma an la mek tih hre chungin, sum leh pai seng lutuk loa Bailey bridge part hlui fawmkhawm a, hun engemaw chen atana hman theih tur Bailey bridge dawh an rilruk a. Hna an thawh tan lai, 2024 May 9 khan amah ngeiin a hmunah tlawhin, hmanraw thar hmanga dawh zawk turin PWD engineer-te a hrilh ta tih chief minister hian a sawi.
Bailey bridge reng reng chu rit lak theih tawk nei vek an nih avangin a hmangtu mipuiin dimdawi leh duat taka enkawl a ngai a, a zawh tawk bak rit laknan hmang lo tur leh uluk taka enkawl turin mipui an ngen tih a sawi. “Sawrkar chuan theihtawp kan chhuah tawh a, mipui pawhin kan tih tur kan tih ve kan beisei a ni,” a ti.
PWD minister Vanlalhlana pawhin kum 1997-a Tuivai lei chhia chuan Manipur-a Zofa unaute nen min daidan rei hle tih sawiin, “He lei hian ZPM sawrkar hun a lo nghak ngar ngar a, vawiinah chuan Manipura kan unaute nen inkalpawhna tha tak kan nei leh ta hi chief minister leh adviser to chief minister Pu Lalmuanpuia, department lama ka thawhpuite bakah he lei dawhkai a nih theihnana tha leh zung ngaihtuahna sengtute chungah lawmthu ka sawi a ni,” a ti.
Tuivai lei dawhna hawnnaah hian Assemby speaker Lalbiakzama, Tuivawl bialtu MLA Pu Lalchhandama Ralte leh sawrkar hotu dang bakah Manipur lam Pherzawl district leh Mizoram lam mipui thahnem tak an tel a ni.
Lei dawhna atan hian cheng nuai 500 sen a ni a. A sei zawng hi feet 200 niiin, a lawnkaina lei feet 50 nen, a vaiin feet 250-a sei a ni. Metric ton 30 dawl zo tura dawh ni mah se, tlo leh him taka a awm theihnan MT 20 chin chauh zawhtir an phal dawn tioh PWD hotute chuan an sawi.
State pahnih inkalpawhna – Unity Bridge hawng
