West Bengal, Kerala, Tamil Nadu, Assam leh Puducherry Union Territory-a assembly inthlana vote tlate chu Thawhtanni hian chhiar a ni dawn.
Assam-ah chuan vote chhiar dan tur ruahmanna zawng zawng peih fel vek a ni tawh a. Bial 126-a vote tlate hi district 35-a counting center 40-ah chhiar a ni dawn a, venhimna khauh tak hnuaiah chhiar a ni ang.
Hmeichhia 59 tela inthlan chuhtu mi 722-te dinhmun chu hriat a ni tawh dawn a. Assam-ah hian April 9 khan vote thlak a ni a, vote 85.96% a tla a ni.
Boruak nei lian ber, West Bengal-ah chuan inthlan thuneituten state puma counting centre 77-ah vote chhiar turin ruahman an siam a, boruak tha lo thleng thei a awm hlauhna avangin venhimna pawh thuah eng emaw zata kalpui a ni tih an sawi.
Bengal hi inthlan campaign boruak lenna ber niin BJP chuan rorel lai, Mamata Bannerjee-i kaihhruai, Trinamool Congress chu paih thlak tumin an bei nasa hle a. Vote thlak zawh hnu thlenga boruak inmung lian tak awmin Inrinni pawh khan vote thlak tihchingpenna awm nia sawi, Falta bialah chuan vote thlak that leh a ni hial a ni.
Tamil Nadu-ah chuan vote chhiar tur mi 10,545 ruat an ni a, micro-observer 4,624-in an tanpui dawn bawk a. Assembly bial khat zel tan counting observer pakhat theuh, an vaiin 234 ruahman a ni a, heng mite hian tluang zawka vote chhiar a nih theih nan an buaipui dawn a, Election Commission-in thu a pek sa chu zawm a nih theih nan hma an la bawk ang.
Puducherry-ah chuan assembly inthlana vote tlate chhiar dan tur ruahman engkim peih a ni a, venhimna leh enkawl dan mumal tak siam a ni.
Puducherry Chief Electoral Officer P Jawahar chuan Election Commission of India-in a ruat observer-te enkawlna hnuaiah a kalphung zawng zawng hi langtlang taka kalpui tum a ni tih a sawi a. Kerala-ah pawh vote chhiar dan tur ruahmanna zawng zawng tihfel a ni tawh bawk.
State pali leh Puducherry-a vote tlate chhiar dawn
