Union home minister Amit Shah kaihhruai high-level committee chuan thawhtanni khan Chhattisgarh, Odisha leh West Bengal-a kangmei venna tihpunna leh tihchangtlunna tur project pathum, cheng vaibelchhe 725.62 senga siam chu a pawm.
Committee chuan heng state pathumte hi ‘Expansion and Modernization of Fire Services’ hnuaiah West Bengal tan cheng vaibelchhe 376.76, Odisha tan cheng vaibelchhe 201.10 leh Chhattisgarh tan cheng vaibelchhe 147.76 pawm a nih thu official thuchhuah chuan a tarlang a ni.
He high-level committee-a hian Finance Minister Nirmala Sitharaman, Agriculture minister Shivraj Sing Chouhan leh Vice Chairman NITI Aayog Suman K Bery te chu member niin, an tel.
Prime minister Narendra Modi-a vision, chhiatrupna laka invenna leh India ram him nan Home Minister Shah kaihhruaina hnuaiah hian Ministry of Home Affairs chuan ram chhunga chhiatrupna thlengte tha tak enkawl a nih theih nan leh hmalakna engemawzat kalpui turin committee hi a din a nih thu thuchhuah chuan a tarlang.
Thuchhuahin a tarlan dan chuan kumin chhung hian cheng vaibelchhe 21,026 chuang chu chhiatrupna kaihhnawih thil hrang hrang atan state-te hnenah pekchhuah a lo ni tawh a ni.
State pathumin kangmei venna kawnga an hmalakna tur central in pawm
