Dholai leh a chhehvela balu var lak thinah Assam lamin harsatna an siamsak fo avangin Mizoram atanga helai hmuna balu la thin tipper neitu leh khalhtute chuan state pawn atanga balu phurhluh hi August atangin dan an tum. Hetihlai hian inkalpawhna kawng chhia avanga lirtheia eizawngten harsatna an tawh mek chu sawrkarin a thawmtha zawnga hma a la lo a nih chuan an thiam dan anga hma lak an tum tih an sawi bawk.Tipper hmanga eizawng pawl pathum intelkhawmna – Mizoram Tipper Association Joint Committee hruaitute sawi danin, Dholai leh Lailapur inkar vel atanga balu var an lak thinah kumin July 15 khan Assam Forest department chuan an member zinga pali (tipper pali) an man a, load an lak hnu, balu man an inpek fel hnu ah chauh an man a, hetianga an buai hnu pawh hian Assam lam mi balu phur erawh an kaltlang tir tho tih an sawi.
Kar khat vel an hren hnu, July 22 tlai khan heng balu phur an mante hi Rs. 13000 chawitirin an chhuah chauh a, tipper neitute leh a khalhtute hian hemi zat aia tam hi a neuh neuhah an la sen belh a, an hren chhung hian an ni lam atangin enkawlna mumal an dawng lem lo tih an sawi bawk.
Balu neitu (mahaldar) te hnena an thlen pawhin puih tumna an nei loa, an hriat zui danin, mahaldar-te hian balu an hralhah hian Assam sawrkarah royalty an lo pe ngai loa, tuna hma rawn latute pawh hi Silchar lam official niloin, Guwahati atanga rawn kal nia an hriat thu an sawi a. Chutihlaiin mahaldar-te chunga hma la loa, an hnen atanga balu latute chunga an tuan daih chu an hrethiam lo tih an sawi.
Heng lai hmuna balu lakah hian tunhma atang tawhin hnam inthliarna an lo tawng fo tawh tih an sawi a. Mizoram atanga balu late chuan sumfai chawi tur neuh neuh an ngah bik a, hei vang hian Mizorama an hralh lehnaah pawh Assam mi lamin an phurh aiin a man a insan hleih lo thei thin lo tih an sawi a ni.
Hei vang hian August 1 atang chuan Mizoram pawn atanga balu lut tur hi Kolasib leh Aizawlah an dang dawn a, dan anga hma an lakna a sawt lo a nih chuan tharum hman a tul pawhin a tul anga an che dawn tih an sawi.
Zawhna chhangin Tipper Association Joint Committee hruaitute chuan, Mizoram chhunga balu an lak theih hi a tam tawk a, indaih loh a awm thei loa an ngaih thu an sawi. Bagha vel atanga balu var hi tha bik leh tlawm bika kan ngaih pawh Mizorama hnamdang cement mistiri-te vang a ni ber tih an sawi a, an ni hian an hnampuite duhsakna atan thiam takin anmahni chhawrtute an hmin thin vang ni ah an ngai ber tih an sawi a ni.
Hetihlai hian Mizorama inkalpawhna kawng chhe lutuk, a bikin Bairabi leh Mamit lam kawng chhia chu sawrkarin a thawmtha lo a nih chuan an thiam angin hma an la dawn tih Tipper Association hian an sawi a. Fur ruahtui tlak lai a nih avangin, black top hlarh chu an beisei bik loa, tlu lo leh tang loa tluang taka an tlan theihna khawp erawh chuan an thawmthat an beisei tih an sawi a ni.
State pawn balu lut tur dang dawn Kawng chhia siam lohah hma lak tum
