Lok Sabaha MP Richard Vanlalhmangaiha chuan Mizoram Universal Health Care Scheme chu state pawnah ngaihhlut a hlawh hle niin a sawi.
Thawhtannia Serchhip District Hospital-a khum 15 awm theihna tur ‘makeshift building’ thar a hawnnaah MP hian, Health deparment chu deparment thang nasa pawl tak a ni a, Mizoram-in Health minister tha tak kan nei a, a lawmawm tih a sawi. MUHCS-in ram pawn thlenga ngaihhlut a hlawh thu leh Serchhip district-ah pawh beneficiary 715 vel an awm tawh thu a sawi a ni.
Serchhip district chu district hmasawn leh danglam bik nia a hriat thu sawiin, DISHA meeting-a district hrang hrang a tlawh kualnaah Serchhip district chu district tam takin central scheme tihhlawhtlin kawngah an pha lo niin a sawi a. Kum 1978-a MLA hmeichhia thlangtling thei district, hmeichhe dinhmun chawisan kawnga hmahruaitu an ni tih a sawi bawk.
Serchhip district bawrhsap Paul L. Khuma chuan, damdawi in khum indaih lo chuan mipui nun leh nitin khawsak kawngah nasa takin nghawng a nei tih a sawi a. Chief minister leh Lok Sabha MP-in Serchhip mipui harsatna hrethiam a, makeshift building sak hlawhtlin theihna atana hma an lakna lawmawm a tih thu a sawi. Serchhip Joint VC-in fund awm sa ni miah lo, awma siama mipui tana an pen chhuak chu fakawm a tih thu a sawi bawk.
Report-a tarlan danin, makeshift building zau zawng hi feet 28×33 a ni a, floor tile phah niin 1st floor-ah toilet European pahnih leh Indian pathum dah a ni a, 2nd floor-ah European pakhat leh Indian pathum dah a ni.
Serchhip bialtu MLA, chief minister hmalakna in NEDFi corporate social responsibility atangin cheng nuai 17.3 leh MP Fund atangin cheng nuai 20 hmuh a ni a; he building sak hna thawktu Joint VC hian sum hman bang awm chu CM Relief Fund-a chhunluh vek an tum tih an sawi a ni.
State pawnah MUHCS an ngaihhlu – Lok Sabha MP
