NEP 2020 leh RUSA 3.0 in a phut angin, Mizoramin state university a neih theihna’n hma an la tih Higher & Technical Education minister Dr R Lalthangliana chuan a sawi.
Ningani khan Govt. J. Thankima College chuan NAAC Accreditation A+ grade an hmuh an lawm a. He hun a hmanpuinaah H&TE minister chuan Rashtriya Uchchatar Shiksha Abhiyan (RUSA) 3.0 leh National Education Policy (NEP) 2020 hnuaia Mizorama college hrang hrangten hamthatna an dawn theihte chu state university hnuaia awm an nih loh chuan an dawng thei tawh dawn lo tih sawiin, “Hemi tur hian state sawrkar chuan hma a la a, Mizoram University-ah mithiamten sawihona hun hmangin an zirchiang a, tun sawrkar kal mek hian thla tam hun a neih tawh loh avangin thui tak a kal theih hmel loh a, amaherawhchu state university nei tur hian hma kan la nghal a ni,” a ti.
Govt. J. Thankima College-in NAAC assessment Grade ‘C’ atanga Grade ‘A+’ a hmu chu hlawhtlinna ropui tak, awlsam taka chan mai theih a ni lo tih sawiin, grade hrang hrang pali zuankhum thei khawpa hma a sawnna leh tumruhna chu chhuanawm a tih thu a sawi a ni.
GJTC hian NAAC Assessment vawithum a hmachhawn tawh a. 1st cycle (2007) khan ‘C++’ grade a hmu a, 2nd cycle (2016) khan ‘C’ grade a hmu a ni. A vawithumna, 3rd cycle hi 2022 December 15-16 khan a hmachhawn a, hetah hian A+ grade hmuin CGPA -3.37 a hmu phak a, hei hi Mizoram sawrkar enkawl college zinga grade sang ber a la ni rih. Accreditation hi 2027 December 19 thleng a nung anga, hemi hnu hian NAAC assessment a hmachhawn leh ang.
Under graduate Arts subject 7 leh management (BBA) a zir theih a. Mahnia intum chawp (self financing) in Management department hi kum 2018 atangin kalpui a ni a, kum 2020 atangin Geography department kalpui a ni bawk. Zirlai mipa leh hmeichhia tan hostel hran an nei a. College Library pawh Mizorama college zingah e-Resource Centre nei awmchhun a ni.
State university neihna’n state sawrkarin hma la – H&TE minister
