Statistics Day – Mizoram GDP

Nimin kha National Statistics Day vawi 19-na a ni a, Directorate of Economics & Statistics buatsaihin hman a ni. He huna khuallian TBC Lalvenchhunga, Adviser to Chief Minister (Planning & Finance) chuan Economics & Statistics-te hnathawh pawimawhzia tarlangin, GSDP Calculation Method fimkhur taka kalpui a pawimawh thu a sawi a.
‘GSDP Calculation Method’ tih vel hi chu mipui nawlpuiin kan hriatthiam loh tur thil a ni a, he lam buaipui tura mithiam bik sawrkarin a ruai a, chung mithiamte kutah chuan kan dah ang. Chutih rual chuan, state economy dinhmun dik tak hriatna tur a nih avangin, ‘fimkhur taka GSDP Calculation Method kalpui a pawimawh’ tih chin erawh hi chu kan kan lo ralkhat hriat ve hlawmin a rinawm.
Kan hriat theih chinah, India state leh UT-te GDP 2022-23 ah khan Mizoram GDP chu 307 (at current prices in rupees billions) niin a hniam ber Andaman&Nicobar dawttu kan ni. Kan chungah Arunachal, Nagaland, Manipur, Sikkim, Pudducherry, Meghalaya te an intlar chho a. Administrative Zone paruk zingah pawh NE kan hniam (2.9%) ber a, kan chunga awm Eastern Region nen 10% deuhthawin kan inthlau.
GDP-ah Mizoram hniamzia kan hriatthiam theih nan khingte khi tarlang kan ni a. Chutih rualin, record-ah chuan, Mizoram hi 11th Five Year Plan (2007-2012) chhung khan India rama GSDP Growth thang chak ber dawttu nihna kan lo hauh tawh a. Khami tum khan Mizoram target kha 7.8% a nih laiin a takah chuan 11% kan kai dawrh mai a. Khatih laia sawrkar hotute pawh khan ‘two digit’ kan kai kha chhuang takin an sawi thin a nih kha. Kum nga chhunga kan state economy thanna kha a sang chak hle tih kan hriatthiam theih nan, a hma chiah 10th Five Year Plan (2002-2007)-ah khan Mizoram target 5.3% atangin 5.7% ah kan lawn chho thei hram a, target khumna hi 0.4% a ni. 11th Five Year Plan-ah erawh 3.2% zetin target kan khum thung.
Kan state GDP hi electric current chu ni se, ‘a fluctuate nasa’ a tih theih mai awm e. Eng pawh ni se, kan economic growth hi a percentage san dan emaw, a digit tam lam emaw hi kan nihna dik tak hriltu a lo ni em em lo a ni ang tih a rin theih a; chutah tak chuan, fimkhur taka GSDP Calculation Method kalpui a tulzia chu a lo lang mai awm e.