Mizoram leh Assam inrinaa Vairengte ram huamchhung, a tu ve ve mahin kut thlak lohna tura an tihna hmunah Assam Police camp pawh turin kawng laih a ni a. Kolasib district bawrhsap chuan Cachar district bawrhsap hnenah tihtawp tir turin a hrilh.
Thudawn danin, Assam Police hian an camp pawhna tur kawng hi Dara Huan, Aitlang Vairengte huamchhungah kumin July thla tir lam khan an lai tan a; fur ruahtui tla nasaah an camp panna kawng leiminin a hnawh vanga kawng hi nawr an ni. He kawng laihah hian Vairengte mi panga – HK Ramhluna, VL Ruaii, J Samuela, Darthanzauva leh Lallawmsanga te hmunphiah huan bakah J Samuela leh Lallawmsanga sangha dil panna, Lallawmsanga kuhva huan leh balhla hmun chu a tan tlang a, hetianga an huan chhunga kawng laih a ni hi an rilru a na hle tih sawi a ni.
Hetihrual hian, heng huan ho hi ramria intihbuai a nih hnu ah, Assam nena inchuhna lai a nih avang leh, state sawrkar pahnihin chet lak rih loh tura an tihna hmun a nih angin, kum 2019 atang khan an enkawl mumal thei vak tawh lo tih sawi a ni.
Assam Police-in kawng an laih hi tunhnaiah ruahsur nasa vanga an thawh that hleihtheih loh rualin, heng lai hmuna huan nei leh sangha dil neite Vairengte mite chu tawngka in an lo vau fo thin tih hriat a ni bawk.
Heng thil hi Mizoram Police-in an finfiah hnu ah Kolasib district bawrhsap chu thil awmdan hriattir nghal a ni a. A ni hian July 30 khan Chachar district bawrhsap hnenah Assam Police-in ‘status quo’ chet an lak hi tihtawp tir turin a hrilh a ni.
Status quo chhungah Assam che Kolasib DC-in titawp turin hrilh
