Strait of Hormuz-ah lawng a kap leh, US-in Iran bei zui nghal

Strait of Hormuz-ah lawng a kap leh, US-in Iran bei zui nghal
Iranian sipaiten Strait of Hormuz paltlang lawng an kap avangin US chuan beihpui a thlak thar leh.
American-te beihpui thlakna chhan letnan Iran-a Islamic Revolutionary Guard Corps (IRGC) chuan tui kawng hi hriattirna dang a awm hma chuan khar a nih thu sawiin, he biala US awmna leh a tanrualpui ramte pawh an beih thu an sawi.
IRGC chuan Jordan-a US awmna an kap tih a sawi a, United Arab Emirates, Qatar, Kuwait leh Bahrain-te chuan Iran atanga missile leh drone-te chu an chhang let hlawm bawk.
Kar kal ta tir lamatuialhthei phur sumdawng lawng pathum beih a nih hnua US leh Iran inkara inbeihna a awm thar leh a ni.
Pathianni zing khan sorkar chanchinbute chuan naval cruise missile hmanga lawng pakhat, phalna la nei lova kal tum kah a nih hnuah Iran chuan Strait hi hriattirna dang a thlen hma chuan a khar tih an sawi.
Guards chuan lawng hi thu pek nawn fo a ngaihthah avangin ‘warning nan a kap a, a ding’ niin sorkar news agency thuchhuah chuan a tar lang.
Khar a nih avanga US ‘beihna’ eng pawh chu ‘na taka’ chhan let a nih tur thu leh he biala an awmhmun tharte beih a nih tur thu a sawi bawk.
US nena an inbiaknaa palai hotu, Iranian parliamentary speaker Mohammad Bagher Ghalibaf ni bawk chuan X-ah ‘lehlam chauh tana thatna awm inremna chu A TAWP TA’ tih a tar lang a. “Kan hrilh che a ni: i thu zawm la, a man pe rawh,” a ti bawk.
US Central Command (Centcom) chuan chawlhkar khat chhunga a vawi thumna nan IRGC hian Strait of Hormuz-a Cyprus flag tar lawng chu ‘rawng takin a bei’ tih a sawi.
Centcom chuan MV GFS Galaxy hi a engine room-a chhe nasa a, ‘a zinkawng a chhunzawm thei lo’ tih a sawi a. Crew pakhat chin hriat a ni lo tih a sawi bawk.
UK-a Maritime Trade Operations (UKMTO) chuan lawnga thawkte chu sipaiten an lawng kalsan tura tih an nih thu leh lifeboat-a an luh phah tih a sawi.
Centcom chuan X-ah, “Iran hi a hmaa sumdawn lawngte beih a nih avanga thubuai siamsak a nih hnuah Memorandum of Understanding zawm a nihzia lantir theihna hun remchang dang pek a ni leh a, a hlawhchham leh ta a ni,” a ti.
US hian Iranian sipai hmun 140 a kap niin sawi a ni a, heng zingah hian missile leh drone hmun, communication network leh vaukama thil an thlithlaina hmun pawh a tel.
IRGC pawhin US hian ‘chhim lam tuipui kama tuipui kama an awmhmun leh telecommunication tower eng emaw zat’ a beih thu a sawi.
Iran chuan a chhan let nan ‘thawh khat nana’ an beih zingah Jordan-a Prince Hassan Air Base an kap a, base-a command & control centre leh MQ9 drone hangar pawh a chhe tel niin an sawi.
Kar kal ta tir lam khan Oman tuipui kamah US-in a rawt kawng zawh an tum laiin sumdawng lawng pathum beih a ni tawh bawk a. US-in chhang leta Iran a beihnaah mi 17 an thi a, mi 115-in hliam an tuar niin Iranian thuneitute chuan an sawi a. Tehran hian Gulf-a US tanrualpui ramte a beih ve nghal bawk.
US President Donald Trump-a chuan Iran nena an inkahhai tihtawp a nih thu a puang zui a. Iranian Foreign Minister Abbas Araghchi-a chuan US chu inremna bawhchhiaah a puh.
Hetih lai hian US hruaitu hian inbiakna kalpui zel tur niin palaite pawhin indawrna a awm theih nan an bei mek tih a sawi a. US chanchinbute pawhin Iran hian American thuneitute hnenah hian lawng an kahte chu tihpalh a nih thu leh anmahni chhungah pawh indemna a nasa tih an sawi niin an tar lang.
Iran-in strait a khar hma lawk hian Iranian Supreme Leader Ayatollah Mojtaba Khamenei-a chuan thu a sawi a, hei hi a pa vui hnua thu a sawina hmasa ber a ni.
A pa, a thlak tak, Ali Khamenei-a hi February 28-a US-Israel tang dunin Iran an beih tan ni khan thlah niin Zirtawpni khan Mashhad-ah phum a ni.
Sorkar television-a thu a sawiah ayatollah thar chuan phuba lak chu ‘ram thutiam’ a nih thu a sawi.
“Kan hruaitu martar thisen leh indona pahniha dan bawhchhia leh mi lainat lova mi thattute laka martarte thisen phuba hi lak a ni ang,” a ti.