SP Aizawl buatsaihin Ningani khan beat system, Mizoram Police Manual-a history sheet vawn dan bakah google sheets leh google docs hman dan chungchang inzirtir a ni a. Aizawl District Executive Force hnuaia Police Station officer -in-charge leh beat officers mi 45 an tel.
Beat system hi Mizoram Police Manual Rule 622-625 hnuaia ziahlan a ni a. Police station area hi beat hrang hrangah then niin, beat tin enkawltu beat officer ruat zel an ni. Beat system hi police leh khawtlang inlaichinna tha zawk neih theih nana ruahman a ni a; beat officer-te hian an bial chhunga sualna ven leh thilsual titu chhuichhuahna kawngah leh dan leh thupek kenkawhnaah mawh an phur a, police leh khawtlang mipui thawhhona tha neihna’na thawktu tur an ni bawk.
History sheet hi, convict tawh leh thilsual tithang (habitual offender) te tan hawn thin a ni a. Thil tisualtu chanchin kimchang leh a thil sual tih thin dan uluk taka vawn a ni. History sheet fel taka vawn hi thil tihsualna ven leh misual chhuichhuahna atan pawimawh a ni a; thilsual tithinte nihna kimchang fel taka vawn a nih bakah ngun taka enthlak zui an nih thin avangin a tangkai a ni.
Digital hmanrua thenkhat – Google sheets, Google docs leh Excel chu record mumal taka vawnnan, data pawimawh inpektawn nan leh a hun taka thil tih zung zung theihna atana hmanthiam chu police-te hnathawh tichaktu atana tangkai a ni.
He training hi Aizawl District Police-te dan leh thupek kenkawh kawngah, mipui dikna chanvo venhimna kawngah leh Aizawl district mipui him tlanna’na tha zawka an thawh theihna tura buatsaih a ni a. Hetiang training, police-te hmasawnna kawng hawi ang chi hi la neih zel tum a ni tih Aizawl DEF hotute chuan an sawi.
Sual dona kawnga puitu turin Aizawl DEF intuaithar
